SAWHKHAWK of the day Zalen hi ka lakna a rei ve ta khawp mai a, kum 7 vel lai chu ka chhiar ve tawhin ka hria. Mi hian an sawisel lai cheu pawh hian kei hi chuan a ngai rengin ka hmu mai cheu va, hma pawh insawn zel zawk niin ka hria. Tun hnaiah phek intihpun hnuah phei hi chuan ziak mi in nei tha ta khawp mai bawk a, keini chhungkua chuan kan duh hle vek mai. Miin chhut sual a tam an tih pawh hi a dik ang; mahse, kei chuan chhiar harsa khawp leh a awmzia tibo khawp chu ka la hmu lo. Dik vek theih chu a tha a; mahse, a lo harsa ve dawn a nih hi ka ti mai a, ka pawm thiam khawp mai. - ZualaR Pu Chhuanlianan Aizawl khawpui hmanlai hun a rawn ziak chuan hre pha ve lo mah ila ka lung a tileng hle mai, ve ringawt mai a. Tuna kan awm dan nen hian ka’n hmehbel chhin vel a, thawl tak maia han awm kha eng emaw changah buaithlak deuh hun chu awm mah se a nuam dawn hian ka hre khawp a, thing hring la tam dawn bawk si, keini ang thingtlanga seilian chuan kan mitthla veng veng mai alawm maw le! - Maramtea Kar hmasaa in article rawn chhuah kha kei chu ka rilrem zawng a ni ve lutuk lo. A thatna lai chu sawi dawn ila kan Supply Minister hi fakna tur chu a tam nameuh mai a; mahse, a fak ang em em kha chu a ni lovin ka hria. Mipui mimirin ni tin mamawh gas kan harsat lutuk ringawtah pawh hian a chiangin ka hria. Mahse, ngaihdan nei thei vek kan ni a, a fakna lai tam takah kha chuan Minister hi fak a phu tho tih chu ka hriatpui e. - 8794686442 Kar hmasaa Presbtyreian Kohhran chungchang rawn sawitu kha ka ngaihdan chiah a ni. Kan ram bikah chuan a Kohhran hi a len em avangin a thiltih leh a chetna hi mi tam ber hriat leh ngaihven a ni lo thei lo va, hei vang hian kan sawi vawng deuh thin mai mai a ni. Anni Kohhran aia kan rama Pathianin a hman Kohhran hi an awm lovin kei chuan ka hria a ni. - Presbyterian ka ni kher lo Vala Kumin kumtir lama rangchachak tawlhruk suam lar tak kha eng nge a chanchin ni ta zel ang le? A thawm hi a reh ta vang vang mai a, keini ang mi mawl ngaih a tha lo thei mai dawn, a tam ropui mai si a. - Remrema Pu Biaksiama a leh a Bible lehlin chu a larpui hle mai. Thenkhatin Presbyterian beih phah nan leh sawisel phah nan an hmang a, thenkhatin Presbyterian dikzia sawi chhuahna atan an hmang bawk a. Whatsapp lama hetiang lam an sawinaah hian ka awm ve a, chutah phei chuan Kohhran hrang hrang awm khawm kan ni bawk a, kan ngaihdan pawh a inang lo khawp mai. Keia lo ngaih ve daih erawh, Pathian thu hi a ropui em a, buaipui tham a ni a, atchilh tham a ni a, sawi luih luih tham a lo ni tih hi a ni. Pu Biaksiama leh a Bible lehlin hmang hian hei hi a rawn lang chhuakah ka lo ngai ve hmiah mai a ni. - Ampuia Gas hi a va han vâng leh ta em em ve maw le! Keini ang chhungkua, sikul kal naupang nei tan phei chuan a buaithlak zual a ni. Zingah hma deuh taka thawh pawh a buaithlak tawh naka laiin gas ren chung chungin, hmanhmawh siin rawng kan inbawl a, a hahthlak bik thin khawp mai. Kan thenawmte phei chuan an nghei tawh a, a hunah an fate sikul an kaltir hman meuh lo chu a ni. Kan sorkar chak tak hian tihngaihna han hre hlauh teh sela aw...., kan mangang a nih hi! - SangteaCT Tun hnaiah ruah a’n sur chiam mai a, chhiatna a thleng nasa hman malh malh khawp mai a, nunna chan hial an awm kha a hriat a hrehawm khawp mai. He Sawhkhawk huangah pawh an lo tar lan fo tawh ang chhiatna tam tak hi kan insiam a ni , tun hnaia sorkarin Dawrpui Venga in sak hlauhawm tak an thiahtir pawh hi kei chu ka lawm a. Tun hnaiah veng pakhatah in hlui tawh tak mai, a thlang lam min duai mai a awm a, a thlanga mite chu an mutui lo thei khawp mai a. Hetiang chi hi chu thuneitu lam hian thiahtir hmiah zel mai se ka ti. Nakinah chhiatna a thlen hnuah kan buaina a zual mai mai thin si. - 9436360899 Chanchinbu pakhatah Aizawl khawpuia hrui inzam hnawkte then faia mumal zawk kaltir a nih thu ka lo chhiar fuh ve a, a lawmawm hlein ka hria. Aizawl hi state pakhat khawpui ve meuh si hi a hnawk lutuk a, vai ram khawpui chu fakna intar vel avanga hnawk a ni a, keini chu hrui inzam hnawk, enkawl mumal loh, chhe palh se a siamtu tur tan pawha chhui harsa tur hian a hnawk a. Thenkhat laiah phei chuan kal paha tauh mai phak a ni thin bawk si a, tunah an han thian ta hlauh hi ka lo lawm hle a ni. Hmun danga tawp deuh lai pawh hi thian zel teh se. - 8794686442 Mizote zingah hian cancer natna vei hi an tam khawp mai tih chu kan hriat hnu vek a ni a. Hei hi kan ei leh in leh zuk leh hmuam kan tih nasat lutuk vangah hian kan puh thin a, a dikna chen a awm ang. Thawkkhat lai khan thalaite zingah tha (nerve) tha lo kha a pung chiam tawh bawk a, enga pawh chu lo ni ta sela, kan ei in hi, tawng mawi lo ni lo sela, a tawp lutuk hian ka hre thin a. Kan sawngbawl dan a lo thianghlim tawk lo lehzel bawk nen, cancer hi chu kan vei nasa hle zelin a rinawm ka ti ve tlat a ni. - Mapuii pi Pathian hi chu a tha mang e! Tun hnaiah nasa taka ruah a sur avangin khuarel chhiatna a han thleng a; mahse, a hnu lawkah chuan ni a sa leh mai a. Eng emaw chhiatna tawk hi chu lo awm ve thin mah se kan ram hi Pathian hian a venghim tlat ni hian kei chuan ka lo hmu thin. Pathian hian chhiatna lian kan tawh hi a phal lo ni maiin ka hria. - Huma