ZALEN April 3, 2025 : MPCC Spokesperson Dr. Lallianchhunga chuan vawiin khan Saitual tlangdunga khaw hrang hrang, Ruallung, Mualpheng, Tawizo, Maite leh Lenchim te tlawhin, heng khua a sawhthing hralh dan a hmunah a en a, Sawhthing chingtute chu patling an ni a, an tap lo mai a ni a ti.

Sawhthing chingtute dinhmun chungchang sawiin Dr. Lallianchhunga, MPCC Spokesperson chuan, "Sawhthing chingtute harsatna tawh mek hi dawhkan nalh tak leh thutna nuam taka thu ZPM sawrkar hotu ten an hriat chian loh zia a takin kan hmu zel a. Sawhthing lei dan turah ZPM ten Research Based a zir chianna an neih lohzia a takin kan hmu bawk a ni."

"Sawhthing chingtute hi patling an ni a, an tap lo a ni mai, an lung erawh a chhia a ni. ZPM sawrkar hotu leh Chief Minister ten thu thlum tak tak sawi reng mah se, kuthnathawktute harsatna an sut kian sak loh chuan awmzia a awm lo. April Fool hi ZPM sawrkar hnuaiah kan hmang reng ang tih hlauhawm tak a ni," a ti.

ZPM sawrkarin sawrkar kum thar, Financial Year a cheng vbch 900 chuang an luh pui anga ZPM-in thuchhuah an siam chungchang sawi langin MPCC Spokesperson Dr. Lallianchhunga chuan, "Cheng vbch 900 chuang sawrkar kum hlui atanga sawrkar kum tharah luhpui anga an insawi hi a dik takzet a nih chuan sawhthing, hmunphiah leh an thlai thlan bik te hi ZPM sawrkar hian chhuanlam dang siam loin, an intiam ang ngeiin leisak vek turin Congress party chuan kan phut tlat a ni. Sum enkawl thiam tehna hi Press Release hmanga insawi ropuiah a innghat lo va, mipuiten kan chhawr leh chhawr lohah zawk a chiang mai dawn a ni," a ti bawk.