ZALEN April 21, 2025 : Kolasib District chhunga MNF VC tling tharte lawmpuina hun vawiina a hmanpuinaah MNF President Zoramthanga chuan ZPM sawrkar chu an sawi lo anga zela awm niin a sawi a, Sawhthing leh thlaite chu thingtum anga dah that a, duh hun huna hralh chi a ni ve lo a ti.

Zoramthanga chuan MNF VC zawng zawngte chu Pathian tihna nen theih tawp chhuaha khawtlang rawngbawl turin a chah a. "Covid hripuiin min nuai a, ramri buai, vawk hri leng, kang mei, lirnghing, Burma leh Manipur, Bangladesh refugee-in min chim bawk a. Harsatna kan tawk nasa hle. Kan tum ber chu damkhawchhuah a ni ringawt mai a ni. Khati chung khan hmasawnna nasa tak kan kalpui thei kha a lawmawm em em a, kha term-ah khan Pathian hnena lawmthu sawina tur kan ngah em em a ni," a ti.

MNF President chuan, "ZPM hi itawm chitin rengin an inzuar a. Bang lehlama nula aw mawi tak, amah kan la hmuhchian loh kha nupuiah Zoram mipuiin kan nei ta a. Kan han vote ta ruih ruih a, kan vote tling ta a. Thil kha an sawi awl bawk a, D-A-H DAH atangin an tan a, tunah chuan an sawi loh ang hlirin an awm ta a. An sawi angin an awm lo a ni. Kum khat chuang an sawrkar chhung hian sawrkar hnathawkah a ni telin an tlahniam zel a, sawrkar hnathawk lian an nuih a za a, naupang inkhuallem kan ang, an ti," a ti.

Zorama chuan, "Sawrkar hnathawk tê deuh ho an lungawi lo mek bawk a, cancer vei pawh an thliar tawh lo. Doctor rual an phin leh a, health care te an ti suakbak vek a. Naupang leh zirtirtute lungawi lohna a in-up chho leh mek a. Sikul dinhmun sang zawka kan hlan zawng zawngte kha an cancel a, Finance Minister-in 'a theih' ka tih avanga kan tih a ni. Covid hripui lai pawhin a theih a, Covid awm loh hnuah a theih loh an ti ta si hi a mak hle."

"Zunteii nu ka siam ang che i tia, lungngaihna hlir lungngaihna hlir, tih ang chiah a ni. Hmunphiah sawi chuan ngaihthlak loh an duh zawk a, sawhthing thar tur zat nia an hriat kha hmun 10-a hmun khat pawh an la lei lo. Sawhthing leh thlaite hi thingtum anga dah that a, duh hun hun a hralh tum chi a ni lo. A huna seng a, a huna hralh a ngai. ZPM sawrkar hi Kut hnathawktute-ah a ni telin an tlahniam zel a ni," a ti.  

Zorama chuan, "Mizo Kristiante hi Pathianin min hman a duh a ni, tih hi ka sawi nawn leh duh a ni. Mizote hi mahni mipui mila Missionary tirchhuak tam ber kan nih ka ring a. Hun hnuhnunga Lalpa'n chanchintha hril turin min duh a, min cheimawi, min ti fip a, min buatsaih mek a ni," a ti bawk.