Aizawl August 13, 2024 : Mizoram hmun hrang hranga Sawhthing tam mek zirchiang tur leh hmalakna kalpui turin 16/8/2004 atang hian District tinah 'Operation Ginger 2024' an nei dawn a, hemi atana inbuatsaih nan vawiin khan Horticulture Department-a Officer te leh Field Staff zawng zawng ten Sawhthing tam leh natnate ven dan leh enkawi dan zirin 'Training of Trainers for Operation Ginger' an nei.

Kumin hian Mizoram-ah Sawhthing ching an tam a, tun hnaiah district hrang hrang atangin Sawhthing tam sawi a tam tan hle a, Horticulture Department chuan hma la nghalin District tina DHO ten report an thehluh a, tun thlenga report chinah khaw 263-a Sawhthing chingtu chhungkaw 6586 te Sawhthing a tâm tan tawh a ni.

Horticulture Department chuan Sawhthing a tam nasat avang hian vawiin khan Horticulture hnuaia thawk ten ko kim zawka inziritirna nei turin 'Training of Trainers' hi an ko a, mithiamten Sawhthing tam enkawl dan te uluk takin an zirtir a. Ni 16/8/2004 hian Sawithing tam beihpui thlakna "Operation Ginger - Fehchhuah Runpui" chu Directorate of Horticultur Office atangin Prof. Lalnilawma, Minister of Horticulture-in a vailiam dawn a ni.

Horticulture a thawkten District tin tuamin an fehchhuak dawn a, Sawhthing natna te, a bawmtu rannungte leh a enkawi dan lehkhabu te siam nghal ni a, a enkawlna damdawite pawh theih ang angin ngaihtuah mek zel a ni. Farmer te lo beidawng mai lo tur leh mithiamte thurawn anga an sawhthing hmunte tha thlah lova lo enkawi zel turin Horticulture Department chuan an chan a ni.

Horticulture report atanga a lan danin sawrkarin thlai pathum a thlan zinga pathum - Sawhthing, Aieng leh Hmarcha te hi District zawng zawngah chin a ni. Sawhthing hi tun dinhmunah chhungkaw 25102 in an ching a, Serchhip, Saitual, Champhai leh Aizawl te chu ching tam zual district te an ni. Aieng hi chhungkaw 3415 ten an ching a, Lunglei, Aizawl, Kolasib, Saitual leh Champhai te chu ching tam zual an ni. Hmarcha hi chhungkaw 8687 ten an ching a, Aizawl, Serchhip, Khawzawl, Lunglei leh Saitual te chu ching hnem district te an ni.