Aizawl; Kum 2018 atanga kumin 2022 chhungin, sawrkar hnathawk ei ruk thubuai siamsak mi 21 an awm tawh a, thiam loh chantir (convict) tawh mi 14 an awm.

ZALEN-in RTI hmanga  zawhna, Mizoram sawrkara vigilance department SPIO-in a chhan danin sawrkar hnathawk ei ruk thubuaia thiam loh chantirte chu lung in tan leh pawisa chawitira hrem an ni a, hremna pekte lung in an luh ngei leh ngei loh erawh court lam chan a ni.

Kum 2018 khan sawrkar hnathawk ei ruk thubuai chungchangah preliminary enquiry (PE) paruk a awm a, regular case ziah luh pasarih a ni a. Kum 2019-ah PE 13 leh regular case ziah luh pahnih a awm a. Kum 2020-ah PE pariat a awm laiin, regular case ziah luh a awm lo a, 2021-ah PE 10 leh regular case ziah luh pali a awm a. Kum kal mekah PE panga leh regular case ziah luh pariat a awm.

Kum 2021-a vigilance department SPIO-in RTI zawhna a lo chhan tawh danin, kum 2013-18 chhung khan ei ruk leh a kaihhnawih thubuai PE 86 leh regular case 39 a lo awm tawh a, chung atang chuan hremna pek mi panga awmin, chung mite chu hrehawm taka lung in (kum 1-4) tang tur leh pawisa Rs. 10,000 - 50,000 chawitir an ni.

Vigilance department-in ei ruk leh a kaihhnawih thubuai a chhui dan tlangpuiah chuan ACB-in complaint/FIR a dawn chu chief vigilance officer phalna la hmasain PE register thin a ni a, PE report chu chief vigilance officer hnenah thehlutin regular case kaltlangpui chi nge a niha thubuai bawhzui tlak loh tih leh disciplinary proceedings draw-na chi tih report a zirin chief vigilance officer thutluknain kaltlangpui thin a ni.