Aizawl May 21, 2023 : Tun dinhmunah MR/PE atanga Group A-ah sawrkar hnathawk mi 49,282 an awm mek a, chung mite thla khat hlawh atana sen thin chu Rs. Vbc. 334.20 a tling. Hetihlai hian tun dinhmunah sawrkar hnathawkten awlsam zawka GP fund an hman dan tur ruahmanna a awm rih lo.

ZALEN-in RTI hmanga zawhna a siam, Finance department SPIO-in a chhan danin tun dinhmunah Mizoram sawrkar hnuaiah Group A employee 4,262 an awm a, Group B-ah 12,713 awmin, Group C ah 12,518 leh Group D -ah 5,972 an awm. 

Sawrkar hnathawkte hlawh atan thla khat atana sen thin chu Rs. Vbc. 334.20 vel a ni a, thla tina sen zat erawh a inang vek lo va. Heng bakah hian muster roll/provisional employee mi 13,817 awm bawkin, chung mite thla khat hlawh atana sen thin chu Rs. Vbc. 17.85 a tling a, thla tina sen zat a danglam thin.

Sawrkar hnathawkte GPF chu tun hmaa department tina allocation pek thin angin tih theih a ni rih lo tih SPIO chhannaah chuan tar lan ni bawkin, tun dinhmunah chuan awlsam zawka sawrkar hnathawk ten GP fund an hman dan tur ruahmanna a awm rih lo.

Mizoramah treasury office 13 awm mekin chung zingah chuan Aizawl South Treasury-in ni khatah Rs. Nuai 100 a pe chhuak thei a, Aizawl North-in nuai 80, Lunglei district, Siaha district, Kolasib district, Champhai district, Serchhip district treasury-ten Rs. Nuai 50 theuh, Lawngtlai district, Chawngte treasury, Khawzawl district, Hnahthial district leh Saitual district ten Rs. nuai 30 theuh an pe chhuak thei bawk.

Sawrkar hnathawk
Category    Awm zat 
Group A      - 4,262
Group B      - 12,713
Group C      - 12,518
Group D      - 5,972
MR/PE         - 13,817