ZALEN April 8, 2025 : Federation of Mizoram Government Employees and Workers (FMGE&W) General Conference vawi 33-na chu vawiin khan Vanapa Hall-ah hman a ni a, an pawl rorel chuan Mizoram Universal HealthCare Scheme (MUHCS) chungchang an ngaihtuah a, sawrkar hnathawkte huamtir rih lo tura sawrkar nawr chhunzawm ni se an ti.

Rorel-ah hian Affiliated Association 99 atanga Rorel Palai 650 vel Mizoram hmun hrang hrang atangin an kalkhawm a, Mizoram Universal Healthcare Scheme (MUHCS) chungchang chu an agenda zingah an khel rei ber niin, affiliated association aiawhte pawhin an pawl ngaihdante an sawi bawk a, FMGE&W General conference chuan Special Assembly thuthlukna lo siam tawh chu a nemnghet a, MUHCS hi a system a la felfai tawk loh avangin sawrkar hnathawkte hi huam tir rih lo tura sawrkar nawr chhunzawm ni se tiin thuhthluk an siam a ni.

ZALEN in thu a dawn danin FMGE&W te chuan sawrkarin sum thawh ve tura a tih te pawh an pawm tlang viau a ti a, anmahni piah lamah mi harsa zawk te an puih theih ve na nia ngaiin tha an ti tlang tih a sawi. Amaherawchu sawrkar hian a empanelled list pawh a la ti chiang thei lo an ti a, chubakah inremna pawh a la ziahpui mumal hlawm loh avangin ringngam har an tih thu a sawi a, MUHCS system la mumal lo lutuk chu innghahna tlakah an ngai lo tlang a ni deuh ber mai a ti.

FMGE&W te hian an hruaitu tur mi 10 an thlangchhuak a, anni hian an post tur an insiamrem leh dawn a ni.

Federation of Mizoram Government Employees and Workers (FMGE&W) General Conference rorel inkhawm thurel te chu :

1. Mizoram sawrkar hnuaia hna lak te hi public interest thlir in Department in an mamawh ang zelin rualkhai zawka lak ni rawh se.

2. Mizoram sawrkar-in a hnuaia thawkte tana Guidelines for framing of Service Rules/Recruitment Rules a siam a qualifying service ngai zat hi a pumpui a ennawn ni rawh se.

3. Vacancy Based Roster (VBR) chungchangah relaxation a awm leh theih nan hma lak leh ni rawh se.

4. FMGE&W office building neih a nih theih nan hma lak ni rawh se.

5. Central sawrkar hnathawkte DA pun ruala Mizoram sawrkar hnathawkte DA a pun ve zel theih nan hmalak zui zel ni rawh se.

6. Mizoram sawrkar hnathawkte kan hnathawhna hmun theuh ah ram leh hnam tana thahnemngai tak leh neitu rilru pu chunga thawk zel turin infuih thar ni rawh se.

7. Affiliated Association Member tin ten FMGE&W inrelbawlna leh hmalakna hrang hrang senso atan hetiang hian sum thawh theuh ni rawh se :

Group A – Rs. 400/-

Group B – Rs. 300/-

Group C – Rs. 200/-

Group D – Rs. 100/-

8. Mizoram Universal Healthcare Scheme (MUHCS) chungchang chu ngun takin kan sawi khawm a, affiliated association aiawhte pawhin an pawl ngaihdante an sawi bawk a, chuan, FMGE&W General conference chuan Special Assembly thuthlukna lo siam tawh chu a nem nghet a, MUHCS hi a system a la felfai tawk loh avangin sorkar hnathawkte hi huam r rih lo tura sorkar nawr chhunzawm ni se in thuhthluk a ni.