ZALEN April 19, 2025 : MNF Treasurer Lalruatkima chuan ZPM sawrkar chuan sawrkar hnathawkte an vau nasa lutuk a, a vuaklet chuan nawrhna a hring mek a, tun atanga lungawi lohna lantir an awm nghal chu thil mak a tling a ti.

Vawiina Hnahthial District Mizo Hnam Run-ah, Village Council 2025 inthlana MNF Candidate tlingte lawmpuina leh chawimawina hun hmanpuitu Lalruatkima chuan, "ZPM Sawrkarin kawngtin rengin sawrkar hnathawkte an vau nasa a, chu chuan nawrhna a hring mek a ni. Inthlan dawn kuma nuar thinte chuan tun atangin lungawi lohna an lantir a, hei ti thil mak a tling. Chu chuan ZPM sawrkar chu sawrkar hnathawk ten an rintâwk loh zia a lan tir a ni," a ti.

ZPM sawrkar chu sawrkar hnathawkte vau ching leh pawl dangte diriam ching an nih thu pawh sawiin Lalruatkima chuan, CSS hnuai thawkte nawrh pawh nu leh pa chan chang loin an vau nghal a. Universal Health Care pawh Private Hospital pakhat mahin inremna (MOU) an la sign pui duh duh lo. Sawrkar hnathawk inzawmkhawm pawlin an dodal bawk. Heng inrem lohna awm te hi dawhkan khat kila sawi fel tum aiin ZPM sawrkar chuan vauna leh tihelna nen, runluih chungin an chawk hnawk zawk a ni, a ti.

Lalruatkima chuan, "A hun pangngai ang chuan October 2025 velah Village Council inthlan buatsaih tur a ni a. Nimahsela, a hun pangngaia inthlan an buatsaih ngam loh avangin chhuanlam tur zawng chawpin inthlan hun thla 6-in an sawn hma a. A hun takah chuan inthlang ila, ZPM hian VC-ah sawrkarna tih tham an la lo ang," a ti.

MNF Treasurer chuan, Buhfai man a lêt thawka tih to te, Petrol leh Diesel man tih sân te, Sawhthing, Hmuhphiah, Hmarcha leh Aieng an lei mumal thei lo te chu VC inthlan hun an sawn hma chhan a nih thu a sawi a. Heti chunga Hnahthial District huam chhungah VC tam tak an la thei chu Pathian remruat a nih thu leh, chu chu kum 2028-a an sawrkar lehna tura hmasialtu a nih a rin thu a sawi.

MNF sawrkar pawisa hnutchhiah crore 110 chu thlai thar lei nan kan dah tha, an ti a. Tunah sawhthing lei nan Crore 36 vel chauh an hmang a. A la chuang Rs. 74 crore hi a rang lamin sawhthing lei nan hmang rawh se, tunah chuan an chawh sa a ro tan a, a then a chawr a. A hlawk loh hun nghah chhuah kher hi ZPM sawrkar thil tih vanduaithlak tak a ni, a ti bawk.