Aizawl; Mizorama sawrkar hnathawk inzawmkhawm pawl, Federation of Mizoram Government Employess & Workers (FMGE &W) in Covid 19 dona atana ni khat hlawh an thawhkhawm chu cheng vbc. 5.35 vel a tling tawh.

FMGE&W hruaitute hnen atanga ZALEN thudawn danin, sawrkar hnathawkte ni khat hlawh thawhkhawm hi a tira an beisei dan ah chuan cheng vbc. 7 vel tling tura ngaih a ni a, amaherawhchu mimal anga thawh remchang lo an awm avang te, department anga ni khat hlawh lo thawh tawh, chumi vanga kumin a awl dil an awm avangte in vbc. 7 chu an tlin a beiseiawm loh tih an sawi. 

Sawrkar hnathawk zingah CM relief fund for Covid 19 a tan a sum thawh an la awm zel tih FMGE&W hruaitute chuan sawiin, tun thleng in cheng vbc. 5.35 bawr vel a tlin tawh thu leh chuta tang chuan cheng vbc.5 chu CM relief fund ah ah chhunluh a nih tawh thu an sawi.

FMGE&W chuan an member te ni khat hlawh thawhkhawm, Rs. 3,00,00, 000 chu June 17, 2021 khan CMRF for Covid 19 ah an lo thawh tawh a, hemi hnu hian member te pawisa thawh la lut kimlo te khawm zui zelin, July 12, 2021 khan Rs. 2,00,00,000 an thawh leh a ni.