DOWNLOAD OUR APP

Read latest news on your phone
app-store
Sawrkar siamtu leh a thlaktu chu mipui an ni
Aug 22, 2015
Chakma Autonomous District Council ah hna 101 lai dan namnula lak hnukkir tura an ngiatna ngaihsak a nih loh avangin kawngzawh leh total bandh huai hawt a ni a. Mi pakhatin a nunna a chan bawk nen, mipui 2000 lai pungkhawm chuan an chunga rorel tura an dah Council member te chenna in, bungrua leh lirthei engngemaw zah an tichhia a. Hemi hnu lawk hian CEM chuan hnalak te chu a hnukkir leh lawi si a ni. Hetiang em ema mipui thinrim inhrithla hi a mak tih piah lam a ni a, 'rapthlak' a kawk a, 'chan tur nei chuang tawh lo a kaw tawpa tan khawh' tih te pawhin vuah ila a inhmeh khawp mai. Mipuiin hnalak hnuhkir an duh chhan hi eng vang nge? Hna lakah sawipuitu nei tha lo te thawm a ni em? Council hruaitute hian an vua leh vang/ duhsak zawng an thun uchuak em ni? Zawhna tam tak a piang thei a, chhan vek sen a ni lo nangin thil dik lo lian tak inphum awm chu a tawpah a puak keh ni maiin a lang a. Ngaihtuahna a kal thui duh hle a, hnalak ah thuneitute uchuak taka an che ngam a nih chuan sum pai vir velah pawh sawi tur ting a awm a rinzawn theih mai awm e. Kum 300 liam ta khan Europe ram France ah Lal leh Koh-hran hruaitute’n mipui an ti rethei hle a, ‘chhiah’ an la nasat vangin ei leh barah mipui an tla hniam a. Lal leh Kohhran hruaitute'n a hmui tui apiang an hap a, mipui an tam thunga. Mipui chu Roreltute lakah helin King Lious XVI chu a lu tansak a ni. ‘French Revolution’ hian kum 10 lai buaina cho chhuak mahse roreltute thuneih na chu nasa takin a kiam phah a, ram inrelbawlnaa bung thar siamtu a ni. CADC a tharum thawhna thleng hi changchawi chi a ni hauh lo a, chutih rualin 'natural justice' atanga thlir chuan dem ngawt a chi loha, an aiawh tura an thlantlin te chungah an lung a awi lo hle a, an duh anga hna an thawh loh avangin Council chungah an inhrithla ta mai ti ila a sual tam pui lo ang. Mipuiin an duh chuan an hlangthla leh thei tih entirna a ni tel bawk a ni. Eng pawh nise tharum thawh naran hi chu chin fo atan a tha lem lo a, duhaia chet nat a awla tum loh pui thlen theitu a ni. Tunlai khawvelah sawrkar tha nei tur chuan langtlang sawrkar tih rik a ni fo a, e-governance buaipui a nih lai mek hian hna zawng tam tak chuan Sawrkar-ah sawipuitu neih that loh chuan hna a hmuh theih loh tlukah an ngai hial tawh a, mi tam tak rilru hliamin a awm an awm thin reng a. Mi chanvo tur chhuha duhsak zawng pek hi kan ram politic-ah hian a hluar hle a, Party hruaitu thenkhat te chuan inthlan laiin campaign nan an hmang a, langsar takin an sawi a, an mi leh sa te chuan mimal dikna chavo, thik thiang loh hialah an ngai tawh a, helai hi mipui leh politician te kalsualna thin lai chu a ni. Siamtha tur chuan Sawrkar lu ber atanga tanin ram kaihhruainaah pawh rik hrawk hrawk ngaih chang a awm dawn a, a sawi a sawi ai mahin chetziain mipui zirtir a tul tawh hle. Kan sawi fo thin angin tuna kan chenna ram lo chu a dang kan nei miau loa, hmun remruallo, kilkhawr leh chhengchhe deuh a nih avanga hnufual pawh ni se a nuam emaw, a hrehawm emawa chhuah theitu chu a chhunga chengte bak an awm lo. Mitinin chanvo kan nei vek a, chu miah chuan dingnghet tlatin eng pawh hmachhawn inhuam a hun tawh niin a lang thei rum rum thin a. Sawrkar chu mipui siam a ni a, a thlak theitu mipui tho an ni a, thuneihna hi mipui kuta awm a ni tih hre nawn ang u.
India leh Myanmar Border Fencing
India leh Myanmar ramri hung tum chungchang hi eng nge i ngaihdan?
Hung hi tha ka ti lo
Hung se ka ti
Ngaihdan ka nei lo

Latest News & Chhiar Hlawh