Aizawl January 10, 2023 : Vawiin khan ZPM chuan kumthar 2023 atana office hawnna ZPM Office-ah an nei a, he hunah hian ZPM Leader Lalduhoma chuan, Politics-ah harh tharna a thleng mek niin a sawi a, Sawrkar tha din tur chuan, sawrkar hunah ni lovin, tun atang hian kalphung tharin a theih chin chin kan kal tur a ni, tiin party mipuite a chah. 

Lalduhoma, ZPM Leader chuan, “Tunlai hian Zoram chhung leh a pawn lama Zofate zingah Political Revival – Politics-a Harh Tharna a thleng mek a. Mipui mimir, a bik takin thalaite zingah, ram veina te, Corruption huatna te, Sawrkar tha zawk chaka tuihalna te a lo langsar sawt ta hle a ni. Member thar thahnem tak mai pekin kan lo awm leh ta a, lawmawm ka ti hle a ni,” a ti a. “Citizenship Amendment Bill (CAB) pass a nih tawh dan kan hria a, tunah Uniform Civil Code (UCC) chungchangah hian CAB ang maia Mizo mipuite phatsan tawh lo turin kan CM leh kan MP te ka ngen duh a ni. Hei hi kan zavaia tangrualin, Kohhran leh NGO te nen i nawr tlang ang u. 

Bangladesh raltlante chunchang sawiin, "Bangladesh tualchhung buaina avangin kan Zohnahthlak unaute min rawn belh tumin an rawn tlanchhia a, kawng lakah harsatna tawkin, ram palailengah an tangkhang a, nunna hial an chan hi ZPM rilru a na hle. CYMA buatsaihin nimin lamah an thlavang hauhna hun hman a ni a. Kan party pawhin thlawpin, party office hawn hun sawn meuhin, party hruaitute leh MLA te pawhin a hmunah kan tawiawm a ni,” a ti bawk.  

Duhoma chuan, “Kan ram leh sawrkar tichhe thin tute hi tutenge kan tih chuan, ruling party zel hi an ni. A tha zawnga hmahruaitu tur ruling party hi awm se chuan, mipuiten kan zui ang a, kan ram chu kan siamtha mai tur hi a ni a. Sawrkar tha kan din dawn chuan, sawrkar hunah ni lovin, tun atang hian kalphung tharin a theih chin chin kan kal tur a ni. Party tinin campaign kan tan theuh tawh dawn a. Tun atang hian corruption hi kan do nghal tur a ni a, kan campaign dan pawh a thianghlim tur a ni," a ti.

ZPM Leader chuan, “Kum tawp lamah kan inthlang dawn a. Semi-Final kan paltlang tawh a, MNF nen Final kan khel dawn a ni. A mala sawrkar ngei turin i tang ang u. Party dangte aiin kan taimain kan thawkrim tur a ni. Kan mimal eizawnna theuhah pawh entawntlak nih tum ila. Khaw hrang hranga kan hruaitute pawh hi khaw khat pa taima pawl an lo ni deuh zel mai a, a lawmawm tak meuh a ni. He kum hi kan ram tan malsawmna a lo nih theihna tura hmanraw tangkai ni theuh turin duhsakna ka hlan a che u,” a ti bawk.