Aizawl October 18, 2022 : PC Party President Vanlalruata chuan, Mipuiin kan chawi chhiah leh thil dang hrang hrang, sorkara lut ngei tura kan ngaih thin zingah cheng vaibelchhe tel teh meuh a bo niin a lang. Sawrkarin hei hi a sawi chian ka phut a ni, a ti.

October ni 18, 2022 hian Peoples Conference Party chuan an office-ah sawrkar sum hmuh chungchang zir hona hun an hmang a. Hun hmangtu Vanlalruata chuan damdawi in-a kan inentirna atanga sawrkar sum hmuh chu cheng 28,000 chauh niin sawrkarin a tarlan niin a sawi. A sawi zelnaah Ruata chuan, PWD khawl chi hrang hrang hawhna man sawrkara lut chu cheng 1,000 chauh a nih thu a sawiin, “Hetiang zat lek hi a ni thei lo,” a ti a, sawrkara pawisa lut anga ziah awm ang lo tak tak a tarlang bawk.

PC Party President chuan, "Heng sorkarin sum a hmuh nia tarlan hrang hrang en hi chuan mipuiin kan pek reng si sawrkara lut lo cheng vaibelchhe tel teh meuh a awm niin lang. A nihna dik tak sawifiah turin sorkar ka phut a ni," a ti bawk.