Assam sawrkar chuan a khua leh tui dik takte chhinchhiahna ‘National Register of Citizens (NRC)’ chu tunhnai deuh khan a tichhuak a, NRC list ah hian an state chhunga khawsa mek mi nuai 40 lai mai chu an lang lo a. Heti anih chuan khua leh tui ah a pawmlo tihna a niin heng mite hian khawiah emaw chuan bihrukna an zawng ngei dawn tihna a ni.   Assam sawrkar hmalakna avang hian thenawm state-te chu nasa takin an inring a, ramriah police dah belhin an state-a lut turte uluk takin an enfiah bawk a. Hetih lai hian Mizoram sawrkar erawh chu a che muang hle niin a lang a, zirlai pawlte leh tute emaw nawrna avangin run dalah a che chhuak ve chauh niin a ngaih theih a, a zia lo khawp mai.   Mizote hi kan la tlem a, kan chhehvela hnamdang awmte ngaihtuah chuan chimral tham lek kan la ni a, sumdawnna kawngah pawh kan inhausak hleihin sum lamah pawh kan inthlau hle a ni. Kan inhumhimna turin British sawrkar khan ILP min siamsak a, hei hi India sawrkar pawhin min chhawmtir zel a. ILP avang hian Mizoram leh hnam hi a la ding hram hram niin a lang.   NRC chungchanga sawrkar hmalakna duhkhawp lo hian MZP chu ramria khaw pathum - Bairabi, Vairengte leh Saiphaiah te duty insiamin NRC nei leh nei lote an check a. MZP te hi chhunzana duty kalpui theilo an ni chungin hriat theih chinah mi 424 ngawt mai NRC neilo, Mizoram luh tum an thawnkir tawh a ni. MZP te an duty reng chunga heti zat thawnkir tur an awm hi a ngaihthat thlak loh hle a, engemaw remchang zawnga lutru hi engzat tak awm ang maw?   NRC chungchang hi sawrkar hian a vei tawk lo hle niin a lang a, a hmingin ramriah chuan police-te dah belh ve bawk mah se run dalah an awm ve mai mai nite pawhin a ngaih theih hial. NRC nei lote hi foreigner, a bikin Bangladesh atanga lo pem lutte an ni a, Bangladesh-ah hian Muslim nuai za tel an awm a, eizawnna leh thil dang vang te in India rama lo luh hi an châk zek zek a. Chuvangin, tuna kan awm ang mai mai ni lova mipui pawhin an rinngam tura police-ten tan an lak thar a pawimawh hle. Chuvangin, tun ai hian sawrkar hian state dang mai bakah ram dang atanga lo lut rute dan kawngah nasa lehzualin tan han la teh se.