Aizawl January 9, 2023: Central YMA-in Raj Bhavan South Gate, Treasury Square-a Bangladesh-a Zohnahthlakte thlavang hauhna programme a buatsaih chu Congress Party chuan tha tiin an thlawp thu an thuchhuah siamah an tarlang. He huna tel Zodintluanga chuan sawrkarin kan unaute himna tura hma a lakna chu theihtawpa tawiawm a ngaih thu a sawi.

CYMA programme buatsaihah hian Congress Party hruaitu - Vice President Lal Thanzara, Treasurer & CLP Leader Zodintluanga Ralte, Lalrindika Ralte, MLA leh hruaitu dang te pawhin an telpui a ni. He hun hmanna a tel Zodintluanga Ralte chuan, "Kan unauten an himna tura pan tur an neih chhun chu Mizoram a ni. Ramin ri nei mahse, hnamin ri a nei lo. Central YMA-in theihtawp a chhuah a, tih theih chin a tlem a, sawrkarin kan unaute himna tura hma a lakna pawh theihtawpa kan tawiawm a ngai," tih sawiin, "Kan unau Zohnahthlakte an himna tura Mizoram rawn pante lo tanpui a, lo dawngsawng tur hian Mizoram mipuite tangrual turin ka ngen a ni," a ti bawk. 

Chittagong Hill Tracts, Bangladesh-a Zohnahthlakte, Bangladesh Sipai leh Arakan Army helte avanga an in leh lo tlan san a, dinhmun hlauhawm taka an awm mek hi Congress Party chuan a pawi kan ti a. Ei leh in tur nei lo leh riahna tur mumal an neih loh avanga an vakvai leh, an sahimna zawnga an in pui Mizoram pana an lo kalna kawnga thihna hial an tawk chu pawi an tiin an tuarpui tih Congress Party chuan an sawi.

Congress party hian 2023 atana Congress Bhavan hawnna leh mi thar lawmluh programme a duan tawh pawh CYMA programme avang hian an thulh phah a, naktukah an party office, Congress Bhawan hawnna hi an nei zawk dawn a ni.