Aizawl: Khawvel pumah Covid-19 a hluar chhoh leh tak avangin Mizoram sawrkar chuan inkaihhruaina thar Standard Operating Procedure (SOP) a siam thar leh a, zan inkhawm neih thin chu tihtawp nghal a ni a, district headquarters ah te zan dar 8:30 atanga zing dar 4 inkarah curfew neih thin a ni bawk ang.

Zirtawpni khan Chief Secretary & Chairman, State Executive Committee, State Disaster Management Authority, Mizoram chu an thukhawm a, tun hnaiah COVID-19 hri a lo hluar chhoh leh tak avangin SOP hi ennawn (revise) tul an ti a, inkaihhruaina thar engemaw zat an siam a. Ruahmanna an siam zinga langsar zual te chu-

India ram pawn leh India ram hmun dang atanga Mizoram-a lo lut reng reng chu Mizoram an lo luhna (Point of entry)-ah Rapid Antigen Test (RAgT) hmanga en dik vek an ni ang a, RAgT negative te chu fimkhur takin selfmonitoring (mahni hriselna inchîk)-in mi dang nena in-contact lovin ni 7 chhung an inkhung hrang ang. Amaherawhchu, an lo thlen hnuah RTPCR/TrueNat test an neih a, negative result an neih chuan inkhung zui a ngai tawh lo ang. RAgT positive te chu enkawl dan tur dinglai (Protocol) angin enkawl zui tur an ni ang. 

India ram pawn atanga lo lut leh COVID-19 UK, Brazil adt. variant/strain lenna ram atanga lo haw te erawh chu Health & Family Welfare Department inkaihhruaina siam angin quarantine ngei tur an ni a. Amaherawhchu, Mizoram an lo thlen hmain India ram chhungah ni 10 aia tlem lo an lo awm tawh a, point of entry-a RAgT negative result an neih erawh chuan ni 7 chhung anmahni inah an inkhung hrang ang. India ram chhûnga ni 10 la cham tling lova Mizoram-a lo lutte chu negative result pawh nei mah se, foreign atanga lo haw anga ngaih an ni ang. COVID-19 test man atan RT-PCR ah Rs. 1,200/-, TrueNat ah Rs. 1,000/- leh RAgT ah Rs. 200/- te bithliah a ni.

Sakhaw biakna in te chu inkhawm nan hawn theih a ni a. Amaherawhchu, tum khatah mihring leng zat 50% aia tam punkhawm loh tur a ni. Thu leh awm hma chu zan inkhawm neih loh tur a ni. Sunday/Sabbath School chu pawla inthen lovin pulpit atangin emaw khaikhawm tur a ni. Inkhawm chhungin zaiho leh hla sak phal a ni lo a, hei hian solo, duet, trio leh quartet te pawh a huam ang.

Mitthi vuina leh inneihna (man hlan, inneih inkhawm leh reception)-ah a hmun-a leng zat 50% aia tam lovin a punkhawm theih ang a, pungkhawmte hi mi 50 aiin an tam tur a ni lo. Hei hian in chhung leh pawna awm program-a tel zawng zawng a huam ang. Chhiatni/thatni puipunna hmunahte mipui a huhova zaikhawm leh hla sak khap a ni. Hei hian solo, duet, trio leh quartet te pawh a huam ang. Mitthi vuina-a kal zawng zawngte hming pum, address leh mobile number chhinchhiah tur a ni a, a remchan dan angin MA/ YLA/ MTP/ YCA emaw LLTF/VLTF ten ruahmanna an siam ang. Loh theih loh thila mi 50 aia tam punkhawm tulna a awm chuan District Magistrate tin ten phalna an pe thei ang.

Office dawr tur reng rengin appointment an la hmasa tur a ni a. Appointment (phalna) neia office dawrtu ten office an dawr chhûng zawngin mask an vuah ngei tur a ni. Tul bikah lo chuan meeting neih loh tur a ni. A huhova inrawn/sawiho ngai thil a awm anih pawhin a theih chin chinah video conferencing leh online mode dangte hman tangkai hrâm tur a ni. Thu leh awm hma chuan Minister-te public interview hun khar rih a ni.

District headquarters-ah te chuan zan dar 8:30 leh zing dar 4:00 inkarah pâwn chhuah khap tlat a ni. Hemi atan hian District Magistrate ten Section 144 CrPC tlawhchhanin thupek an chhuah ang.

Class IX leh Class XI zirlai ten school leh hostel an lut thei ang a. School lut tur reng reng te chu thermal screening hmanga lo endik vek tur an ni ang a, hostel-a lut tur reng reng chuan RT-PCR/TrueNAT test/RAgT negative certificate hostel an luh hma darkar 96 aia rei lova lâk an nei ngei tur a ni. Class VIII leh a hnuai lam zawng chu sikul kal lovin online mode-in zirtirna kalpui tur a ni. May 4, 2021 atanga school luh tan tura ruahmanna pawh sut leh a ni. Class VIII leh a hnuai lam promotion exam tur pawh online exam emaw, internal assignments/tests an lo neih tawh atanga assessment siamin result siam tur a ni. Anganwadi centre pawh hawn rih loh tur a ni.