Nau pai lai Muslim nu pawngsual rawntu mipa 11-te chu India-a Supreme Court-in an chhuah hun hmaa chhuah an nihna hlihsakin lung inah an kir leh dawn.

Gujarat-a kum 2002-a Muslim duh lohna thil thlenga tharum thawhna nasa tak chhuakah heng mite hian Bilkis Bano-i an pawngsual rawn a, a chhungte mi 14 an thahsak avangin dam chhung tang tura tih an ni.

Hetih lai hian August, 2022 khan Gujarat sorkar thupekin chhuah an ni.

Chhuah zalenna thupek chhuah a nih rual bakah an chhuah hnuah Hindu an nih avangin nasa takin miin an lawm a, khawvel pumah hei hi demna a nasa hle bawk.

Bano-i’n Supreme Court-a ngenna a thehluhah chuan heng mite chhuah an ni hian ‘khawtlanga ngaihdan inrualkhai a tinghing’ tih a tar lang.

A thil tawn chu ‘ram chhunga pawikhawihna rawng ber pakhat’ tia sawiin, chhuah zalen an ni ta mai chuan ‘a thling zawng zawng fanin a ngaihna reng a hre lo’ tih a sawi bawk.

Judge pahnih thutna Supreme Court bench, Justice BV Nagarathna-a kaihhruai chuan Gujarat state chuan an chungthu rel a nih lai pawhin dan angin a pawm theih chin ang tawk a ti lo va, an chungthu pawh an thenawm, Maharashtra-a court-a ngaihtuah a nih phah tih a sawi.

Bench chuan sorkarin ngaihhnathiama a chhuah chu engmah lo a nih thu leh heng mi 11-te hi chawlhkar hnih chhungin lung inah an lut leh ngei tur a nih thu a sawi.

Court sang ber thutlukna hian sawi a hlawh zui hle rin a ni a, a bik takin Prime Minister Narendra Modi-a chungchang a rik tam rin a ni a. Buaina chhuah lai kha Gujarat chief minister a nih lai niin mi tam tak chuan engmah a tih loh avangin an sawisel nasat phah a. Ani erawh chuan tih dik loh a neih loh thu leh ngaihdam dil chhan tur pawh a neih loh thu a sawi bawk.

Court-ah hian kum 2008-a trial court-in thiam loh a chantir mi 11-te chungchangah hian Gujarat sorkar aiawhtute chuan kum 14 chuang lung inah an awm tawh a, chhuah an nih chhan hi an kum a tam tawh a, lung inah an nungchang pawh a tha tih an sawi a. Chhuah hi state sorkarin sorkar laipui pawmpuina a dil a, home ministry-in a phalsak a, he ministry hi Modi-a thuihhruai hnai tak, Amit Shah-a enkawl a ni.

Kum 2022-a Godhra lung in atanga chhuah an nih khan pasaltha ang maia lawm an ni a, an chhungten chithlum semin an zahna lantir nan an ke an khawih bawk.

Bano-i leh a chhungte beih kha intualvuakna chhuaka a rapthlak ber pakhat a ni a, buaina hi Godhra-a rel kangah Hindu biakzin mi 60 lai an thih atanga intan a ni.

Rel hi Muslim-te halah puhin Hindu-ten Muslim chenna veng an beih phah a. Ni thum chhungin mi 1,000 chuang an thi a, a tam ber hi Muslim an ni.

Rel a kan tukah hian hetih laia kum 19 mi, Bano-i hian rai teuh chungin a fa upa zawk hmeichhia nen Godhra bula Randhikpur-ah a nu leh pate a tlawh.

Miin an khua beia Muslim chenna an hal lai hian a chhungte mi 16 nen an tlanchhia niin kum 2017 khan BBC a hrilh a. A hnu ni rei vak lovah mosque leh Hindu an hmelhriat mi tha hnen remchang an bel zui ta niin a sawi.

March 3, 2002-ah mipa rualin ‘ngunhnam leh tiang nen’ an bei.

“Pakhat chuan ka fanu chu ka mal chung atangin a phih thla a, leiah a paih a, lungah a lu a tauh na hle,” a ti.

Amah beitute chu an thenawma cheng, ni tin deuhthaw a hmuh thinte an ni a. A kawr an pawh thlersak a, khawngaih a dil chungin vawi tam an pawngsual niin a sawi.

A laizawn (cousin) pakhat, a hma ni hniha nau hring pawh an pawngsual a, an that a, a naute thar pawh an thahsak niin a sawi.

Bano-i hian nikhua a hriat loh zui avangin a beitute hian an kalsan a, a thi niin an ngai niin a sawi a. A chhungte zinga mipa naupang kum sarih leh kum li mi nen chiah an dam chhuak niin a sawi.

Dikna a hmuh theih nan hian a bei nasain a kawng a thui hle a. Police leh sorkar thuneitu thenkhatin an vau a, finfiahna a neihte tihchhiat niin a chhungte thite pawh post-mortem exam lova phum an ni a. Doctor-ten an endiknaah pawngsual a nih loh thu an sawi a, thaha vauna thlengin a dawngt.

Supreme Court-in sorkar laipui hnuaia mite chhui tura a tih hnuah, kum 2004-ah chauh mi man an nei a, thubuai pawh hi Gujarat-a ngaihtuah rem ti lovin Mumbai-ah ngaihtuah daih a ni.

Kum tam tak chhungin court-in mi eng emaw zat buaina chhuak avangin thiam loh a chantir a; mahse, mi langsar tak takte chu bail leh court sang zawnga kal dilin man an ni lo va. An zingah hian Modi-a Gujarat sorkara minister thin, Maya Kodnani pawh a tel a, ani hi trial court chuan hmun pakhata ‘buaina chhuahna bul’ ti hialin a sawi.