Aizawl: Nimin zing dar 7 atanga nizan dar 7 inkar chhung khan Serchhip Assembly constituency ah inthlanna tluang taka neih a ni a. Vote tla hi a tha hle a, hriattheih chinah vote hi 83.8% tla a ni.

ZALEN thudawn danin khua in a zirloh avangin nimin zingkarah vote thlak an tlem a, mahse chawhnu lamah vote thlak hi an tha a. Khawi hmun atang mahin buaina thleng hriat tur a awm lo a, sawrkar atanga inthlan buaipui tura ruat te leh MPF te uluk takin an duty a ni. Serchhip bial Assembly bye-election neih tur buaipui tur hian polling party 36 ruahman niin Polling Party pakhat-ah hian Presiding Officer leh Asst. Presiding Officer pakhat ve ve bakah Polling Officer pahnih zel an awm a, venhimna lam hna thawk turin Police pahnih zel dah an ni bawk. Serchhip bialah hian khaw 4- Serchhip, Thenzawl, Buangpui leh Neihloh te an awm a. Polling Station 29 awm bawkin vote nei thei mipa 9191 leh hmeichhia 10,329; an vaiin vote nei 19,520 an awm a, heng bakah hian Service Voters 198 an awm bawk. Postal Ballot hi 176 pekchhuah a niin heng zinga 144 hi kum 80 chunglam an ni a, pianphunga rualbanlo (PwD) mi 32 an awm bawk a, postal ballot pekchhuah atang hian mi 167 ten vote an thlak, vote thlak lo mi 9 an awm, an zinga 2 chu an boral hman a ni. Vote tla te hi strong room-ah dah a ni ang a, May ni 2,2021 (Pathianni) ah chhiar a ni ang.

Tun tuma Serchhip bial bye-election ah hian Candidate 6 an awm a, chung te chu Bharatiya Janata Party (BJP) Candidate Lalhriatrenga Chhangte, Indian National Congress (INC) Candidate PC. Laltlansanga, People's Conference (PC) Candidate Vanlalruata, Mizo National Front (MNF) Candidate Vanlalzawma, Zoram People's Movement (ZPM) Candidate Lalduhoma leh Independent Candidate Ramhlun-Edena te an ni.

Serchhip DC Kumar Abhishek chuan khawi hmun atang mahin model code of conduct bawhchhiatna liantham an dawng lo tih a sawi a, "India ram hmun hrang hrangah ka lo awm ve tawh a, Mizoram tluka inthlanna felfai leh muanawm hi ka la hre ngai lo a ni," a ti. Serchhip SP Stephen Lalrinawma chuan inthlanna muanawm neih anih theihnan venghimtu Police 260 rawih an nih thu sawiin, "Dan leh thupek bawhchhiatna liantham thleng a awm lova, boruak tha a awm theihnan theihtawp kan chhuah a ni," a ti. Mizoram Peoples Forum district president Rev. Zohmunmawia pawhin, "Party te nena thawhhona kan siam party hrang hrang ten an zawm tha a, lawmawm kan ti hle a ni," tiin inthlanna thianghlim leh felfai a awm theihnan MPF chuan theihtawpin hma an la tih a sawi bawk.

Candidate hrang hrang te chuan tlin an inrin thu an sawi vek a. ZPM candidate Lalduhoma chuan inthlan hmasa aiin a chakna a san a rin thu a sawi a. MNF candidate Vanlalzawma pawhin mipui-in an puih that avangin tlin a inring tih a sawi bawk a, MPCC candidate PC Laltlansanga pawhin beiseina sang tak a nei tih a sawi bawk.