Aizawl August 30, 2022 : Serchhip JAC ten District Hospital building thar sak thuai an phut a, Serchhip atanga Tuikum Constituency-a District Hospital sawnchhuah tuma hma la tawh lo turin Er.Lalrinawma MLA an duh tih an sawi.

Vawiin khan Joint Action Committee on Serchhip District Hospital Site hruaitute chuan Serchhip Press Club-ah chanchinbumite kawmin Power Grid Corporation of India (Ltd) CSR Fund atanga Serchhip District Hospital sakna tur Rs.21 crores an hmuh, May 27, 2022 daiha CM ho meuhva MoU ziah tawh chu sak thuai an phut tih an tarlang a, CM duhdan angin Health Minister-in hma a lak thuai an beisei a, hetihlai hian Serchhip Constituency chhunga Hospital awm lai sawnchhuah tuma Tuikum Bialtu MLA lo phe ve sek chu an ngaimawh hle tih an tarlang.

JAC Chairman Kapliana Pachuau chuan, “Serchhip Dist. Hospital Bukpui daia sawnchhuah a nih theihna atan hian Tuikum Bialtu MLA Er.Lalrinawma’n nasa taka hma la in CM leh Health Minister te, Health Deptt. Official te thlengin na takin a kar niin kan hria a, hei hi tak tak a nih chuan a pawi kan ti hle. Serchhip Dist. Hospital hi Serchhip Constituency atangin engtikawngzawng mahin Tuikum Constituency ah sawnchhuah kan phal ngai dawn lova, kan Hospital min sawnchhuahsak tuma a hmalakna hi chawlhsan tawh se kan duh hle a ni” a ti bawk.

Press Conference hi Joint Action Committee on Serchhip District Hospital Site Chairman Kapliana Pachuau, “Serchhip District mipuiin tangkai taka kan hman mek Serchhip District Hospital Building thar Power Grid Corporation of India (Ltd) CSR Fund Rs. 21 crore hmanga sak a ni tur hi kan lawm hle a. He Rs.Vbc 21 hi a hmun ngaia Hospital Building thar sakna tura Detailed Project Report(DPR) siam, dilchhuah leh pek a nih ang ngeia sak thuai hi kan phut tlat a ni,” a ti.

JAC Chairman chuan “Serchhip Dist. Hospital thar sakna atan hian NGO Co-Ordination Comtt. ten Bukpui ram an rawt a (Hemi tum hian Joint VC te pawh an telve nghe nghe), kan Chief Minister zahawm tak Pu Zoramthanga pawhin July 25, 2022 Thawhtanni khan Serchhip Auditorium ah Bukpui rama sak a nih tur thu a rawn puang a, Serchhip mipui pawh kan nghing dual a ni," a ti. 

“Hemi hnu hian Joint Action Committee on Serchhip District Hospital Site hruaitu ten VC, YMA, MHIP leh MUP Branch hrang hrangah ngaihdan an la ta a, CM hi August 16, 2022 khan a Office-ah thil awmdan hrilhin a hmun ngaia Hospital Building thar sak duh Serchhip mipuiah an tam zawk tih Seal leh Signature hmanga VC, YMA, MHIP leh MUP Branch hrang hrang ten an tarlanna leh nikhat thilthua Serchhip Bazar-a Signature an lakkhawm te kan hlan a. Hemi tum hian CM pawhin Health Minister Dr.R.Lalthangliana chu thil awmzia a hrilh a, Health Deptt. thuneitute Serchhip ah an rawn tir chho a, Hospital thiah chhunga lo luah lailawk tur lo enpui turin JAC hruaitute hi a lo ngen a, a chungah JAC hruaitute pawh kan lawm hle a ni.” a ti a.

Kapliana Pachuau chuan, “Chief Minister zahawm tak Pu Zoramthanga duhdan angin kan Health Minister zahawm tak Dr.R.Lalthangliana pawh hi hma la thuai a, CM duhdan anga Health Deptt. thuneitute Serchhip ah rawn tir chho a, Hospital thiah chhunga luah lailawk tur Building enfel thuai kan phut a ni,” a ti.