Aizawl May 10, 2024 : Aam Aadmi Party Mizoram chuan nakum 2025-2026 session tharah chuan sikul tan hma thla khatan lehkhabu lei tur hi a awm kim theih nan sawrkarin chak zawkin hma la ngei tawh se an suh tih an sawi.

Vawiina chanchinthar thehdartu te an kawm naah AAP chuan 2024-2025 session atan sawrkarin 5.4.2024 sh sikul tan turin sikul zawng zawng a ti a, amaherawhchu vawiin 10.5.2025 thleng hian Class 1-VIII zirlaiten zirlaibu an la changkim thei lo chu hriatthiam har an tih thu an sawi a, English, EVS leh Mizo te chu lei tur a awm loh avangin zirlai tam takin harsatna an tawk an ti. Sawrkarin zirlaite hmakhua ngaiin a rang thei ang bera lehkhabu an chan kim theih nan hma la vat se an duh.

2023-2024 session-ah pawh rei tak chhung zirlaiten zirlaibun an nei thei tawl lo an ti. Session tharah sawrkar thar hnuaiah hmasawnna tam tak hmuh a nih laia zirna kawngah hmasawnna hmuh tur la awm lo chu pawh an ti a, zirlaiten zirlaibu an nei kim thei lo chu hriatthiam har an ti.

AAP chuan hetiang a thlen chhan hi sawrkar inthlahdah vang leh zirna ngaihsak tawk loh vangah an ngai a, a hma thei ang bera zirlaiten zirlaibu an chan kim theih nan hma la se an ti. Hetiang harsatna hi Class- IX chunglam ten an neih loh laia elementary leh primary section ten an neih fo thin hi sawrkarin zirna a ngaihpawimawh tawk loh vanga an ngaih thu an sawi.