Aizawl : H&FW Minister Dr.R.Lalthangliana chuan vawiin khan District Hospital Siaha-a Paediatric Intensive Care Unit (PICU) leh High Dependency Unit (HDU) a hawng. ZMC-in recognition a hmuh tak avangin doctor indaihlohna pawh a ziaawm phah a rin thu a sawi.                    

Minister Thangtea chuan, "Covid hripui leng leh harsatna avangin kum 2 chuang hna thawk tha hlei thei lovin awm mah ila, hnathawh theih hun reilote chhung hian hmasawnna hmuh tur a awm chho zel chu lawmawm a, vawiina PICU leh HDU changtlung tak District Hospital Siaha in a han neih thar leh te hian min ti lawm hle a ni," a ti.

Minister chuan Mizoram Health Systems Strengthening Project (MHSSP) hnuaiah District Hospital Siaha pawh cheng nuai 276.7 senga thuam that tum thu sawiin, "He project hnuaiah hian Mortuary room sak te, Administrative Building, OPD building, Trauma Centre, Main Building rawng hnawih that, bang leh slab chhia/leak lai plaster that, floor leh wall tile phah that tur bakah, hmun pawimawh laia CCTV vuah tur te a ni. July thla laihawl vel atang chuan hna pawh thawh tan theih beisei a ni," a ti bawk.

Medical College tan recognition hmuh chu thil awlsam a nih loh thu leh ZMC-in recognition a hmuh chuan doctor lamah pawh harsatna a sutkian a rin thu sawiin, "Tun hnaiah ZMC in recognition kan hmu a, a lawmawm hle a ni. ZMC 1st Batch, internship bei mek ten an zirlai an lo zawh hunah chuan Tipa, Phura, Chhaoló PHC te pawn doctor an nei ve thei ngei tawh ka beisei a ni," a ti. 

Minister chuan Kumin Remna Ni lawmna pualin Hnathial District-ah 2days- Free Health Camp buatsaih tum a nih thu sawiin, chutiang chu Siaha district-ah pawh neih a ni ve theih nan ruahmanna a lo siam tur thu a sawi.