September 18, 2023; Siaha Jail atanga a tlan chhuah hnu a, central jail a man, chumi hnu a police te kut atanga tlan chhuak a mi In rawktu Vanrampana (24) chu vawiin chawhma dar 10 bawr vel khan Bawngkawn police ten an man.

Police atanga ZALEN thudawn danin, Vanrampana hi chawhma dar 10 vel khan, Rangvamual lam, Asenchi lane an tih ah Bawngkawn police ten an man a, mi in rawk thubuai a neihna Vaivakawn police te kutah chawhnu dar 1 vel khan hlan a ni.

Vanrampana nia hriat hian nimin chawhma inkhawm hlan khan Kanan veng a HK. Ngamliana In luahlai chu a kawngkar kar chhia in, mobile phone leh garage a an dah two wheeler taxi a ru a, an chhuizuina ah man tlawm takin a mobile phone ruk a hralh a, a scooty pawh Rs. 1,500 a dahkhamin mi kutah a dah bawk.

Chhuizui a nih na ah two wheeler taxi a kawltir te hian nimin tlai khan Vaivakawn police station ah scooty an dah let a, rukru ber erawh a tlanbo avangin zawn zui a ni a, vawiin chawhma khan man a ni ta a ni.

 September 9, 2023-a Siaha District Jail atanga tlan chhuak Vanrampana, Meisatla, Siaha hi Zirtawpni chhun dar 1 khan Central Jail, Aizawlah man a ni a. Vanrampana hi Central Jail-ah tang dang kan turin a inziak lut a, dutyte'n a chezia uluk taka an en hnuah ringhlelin, jailor hnenah hruai a ni.

Jailor chuan Siaha District Jail thuneitute a bia a, Siaha District Jail atanga tlan chhuak Vanrampana a ni ngei tih finfiah a ni.

Vanrampana hi Zonuam police Outpost-ah pek nghal a ni a, police-ten medical tia an hruaichhuah hnu, police outpost an thlen hnuah a tlan chhuak leh a ni.

Amah hi rukruk thubuai avanga man niin, court-in a thubuai a ngaihtuah lai mek a ni.