ZALEN January 13, 2025 : Sialhawk Lakhuihthei Society ten tun hnaia thuchhuah an siam chuan Sialhawk khawchhuak leh khaw mi te inkarah inhnialna a siam a, Lakhuihthei ching zingah ngaihdan inang lo a awm a, naktuk zan hian hmanhmawh takin Society hruaitu thar thlang turin inbuatsaihna kalpui nghal a ni.

Sialhawk Lakhuihthei chingtute thuchhuak chuan 2023 khan Lakhuihthei hralhna tur Mizoram Sawrkarin a ngaihtuahpui avangin Lakhuihthei Quintal 12,000 vel an hralh chhuak thei a. Nikum 2024 khan Sawrkar lam atangin a hralh chhuahna kawngah puihna an hmuh loh avangin anmahni in an theih angin Market an inzawn a, Quintal 9,000 vel hralhna tur an hmuh laiin Quintal 4,000 vel chu hralhna tur an hriat loh avangin a tawihral an ti.

Lakhuihthei chingtu zinga pakhat chuan he thuchhuah hi a dik tawk lo tih sawiin 2023 khan Lakhuihthei hi khaw dang te nen hralhnaah an inel tawh avangin harsatna an tawk a, hralhna lamah an buai bakah tuna an thar chhuah lai mek te pawh a hralhna turah buaina an tawh chhoh avangin chhungkaw engemaw zat chuan an Lakhuihthei hmun hi an thlahthlam a, kum hmasa lam aiin Lakhuihthei tharchhuah pawh hi a tlem a, hetiang zat tawihral anga sawi hi a dik tawk lo niin ZALEN a hrilh.

Thudawnna chuan 2023 pawh khan Lakhuihthei hralhna hi a harsat avangin Society hruaitu ten khatihlaia Deputy Chief Minister leh bialtu ni bawk Tawnluia an pun a, MIFCO chuan an Lakhuihthei te hi ba in an lak sak a, he ba hi sawrkar lai hian tun hnai khan a rulhsak zawk a ni, a ti bawk.

Sialhawk atanga thudawnna chuan sawrkar hian a ngaihsak an ngai hle tih a sawi a, Lakhuihthei sawngbawlna tur leh wine license te bakah an tharchhuah lakchhuahna an huan panna tur kawng chu engmaw ti zawng tala an ngaihtuahsak ngei a ngai a ti.

Chhungkaw 507 vel awmna khua Sialhawk-ah hian Lakhuihthei ching hi chhungkaw 250 vel an awm a. 2023 atanga khan a hralhna lamah harsatna an tawh chhoh deuh avangin an Lakhuihthei hmun thlahthlam an awm a, hei hian tharchhuah pawh a tlahniam niin thudawnna chuan a sawi. Quintal 4,000 vel hralhna tur hriat loh anga sawi hi thu dik tawk lo a ti a, Lakhuihthei huan enkawl tha hovah harsatna tawk an awm lo nia sawiin, huan enkawl that loh, Lakhuihthei rah tha lo chu hralhna lama hnawng niin a sawi bawk.

Lakhuihthei hi chawhrualin Kg.1 Rs.10/- in an hralh angin Sialhawk Lakhuihthei Society te chuan an chhut a, nikum khan Rs. 90,00,000/- vel an lei laiin Rs.40,00,000/- man vel a tawihral thung a ni an ti. Nikum lamah hralhna lamah an buai bakah tuna an thar chhuah lai mek te pawh a hralhna turah buaina an tawh chhoh zel avangin chhungkaw engemaw zat chuan kumin ah hian Lakhuihthei chin hi bansan an rilruk tih an sawi.

Hetihlai hian thudawnna chuan Lakhuihthei hi huan ngialngheta neih an tam avangin VC ramtheh Lo-a nei pawh an tlem sawt niin a sawi ve thung.