Sierra Leone khawpuia tuialhthei phur puakah mi 90 chuang thi

Admin - Nov 07, 2021

March thla maiah pawh khan khawpuia mi rethei chenna vengah kanggmei nasa tak a chhuak a, mi 80 chuang kang hlumin mi 5,000 chuangin chenna in an nei loh phah

freetown chhiatna

Lawngchawlhna khawpui, Freetown-ah hian mi maktaduai khat chuang an cheng a, tun hnaiah chhiatna lian tak tak an tawng zing hle.

March thla maiah pawh khan khawpuia mi rethei chenna vengah kanggmei nasa tak a chhuak a, mi 80 chuang kang hlumin mi 5,000 chuangin chenna in an nei loh phah.

Kum 2017 khan ruah nasa tak sur avanga khawpui chhung leh a chhehvela lei/chirh nasa taka a tawlh avangin mi 1,000 chuang an thi a, mi 3,000 chuangin chenna in an neih loh phah tawh bawk.

Sierra Leone khawpuia tuialhthei phur leh lirthei dang insu, puak zui ta avanga kangmei nasa tak chhuakah mi tam tak an thi tih central morgue leh tual chhung thuneituten an sawi.

Zirtawpni zan lai pelh (India-a Inrinni zing dar 3:30 vel)-a chhiatna thlengah hian sorkar chuan thi zat hi la puang chiang thei lo mah se Freetown-a central state morgue manager chuan ruang 91 an dawn tawh thu a sawi.

Freetown khawchhak lam dai, Wellington an tihah bus-in tuialhthei phur hi suin a puak zui ta a ni.

Thi zingah hian lirthei atanga lirthei putte lo dawhtute pawh an tel niin lawngchawlhna khawpuia an mayor, Yvonne Aki-Sawyerr chuan Facebook-ah a tar lang.

Ruang kang chhe tak tak a tam bakah a bul hnaia dawr leh chenna inte a kang bawk niin social media-a thlalak thehdarhah chuan a lang tih Reuters news agency chuan a tar lang.

“Social media-ah thlalak leh video a darh nasa hle a ni,” tiin Aki-Sawyerr chuan a sawi a.

“Titiah chuan mi 100 chuang an thi nia sawi a ni,” a ti bawk.

Thite bakah thil chhe dang hi kimchanga hriat theih a la nih loh thu mayor chuan a sawi a. A deputy nen disaster management thuneitute puia a hmunah an awm thu a sawi bawk.

“Thi tam tak, ruang kang chhe tak tak pawh hmuh tur a awm,” tiin National Disaster Management Agency hotupa, Brima Bureh Sesay chuan sawiin social media-a thil thleng video a tar lanah chuan, “Rapthlak, chetsualna rapthlak tak,” tiin a sawi.

A hmuna chanchinbu awm, Omar Fofana chuan Al Jazeera hnenah mi 100 chuang hliam an awm thu leh damdawi in hrang hrangah dah an nih thu a sawi.

Damdawi ina thawkte pawh an buai a, tanpui tur tam vangin an indaih lo hle.

Chhiatna thlenna hmun hi kawngpui lun lai, Choithram Supermarket bul a ni a, “Thi leh hliam tam tak hi an lirthei chhunga kang an ni,” tiin Fofana chuan a sawi.

Inrinni chawhnu khan sorkar hotu liante chu an thukhawm nghal a, hei hi vice president-in a kaihruai.

President Julius Maada Bio erawh United Nations huaihawta sik leh sa sawihonaah Scotland-ah a awm mek a, chhiatna an tawh chu ‘inhlohna rawng tak’ tiin a sawi.

Share now