Aizawl July 18, 2023 : MNF National Core Committee Member, D. Thangliana, Ex-MLA chuan MNF chuan silai nen kum 20 chhunga zalenna an sual hnuah pawh remna neih hnuah pawh silai tellovin zalenna an la sual reng niin a sawi a, Mizoram chu barhluih hnuaia India a luh atangin zalen ni a la neih ngei a rin thu a sawi.

Vawiina MNF Aizawl East-l, North Block chuan Sihphir Neihbawi ah Political Training an nei a he hun hmanpuitu, D. Thangliana, chuan, "Pathian leh kan ram tan ti tlattu kan nih avangin, MNF a awm hi a thlamuan thlak a, kan nghet tlat thin a ni. Mi tlawm tak takte hmanga he pawl hi Pathanin a din a ni a, silai nen kum 20 chhung zalenna kan sual a, remna neih hnuah silai tellovin, dan hnuaiah zalenna hi MNF ten kan la sual reng a ni, chu thu chu kan Dan bu ah pawh zalenna sang ber nei turin, kan thil tumah ziah lan a ni a. Barhluih hnuaia India a kan lut hi zalen ni kan la nei ngei ang, a ti a.

Party dang chuan rorelna chan tumin theihtawp an chhuah a. MNF chuan sawrkarna chauh neih tum lovin, zalenna nei turin an la bei reng a, party dang nen khaikhin theih an nilo niin a sawi. Sakhua humhalh leh tundin chu an kal phung a nih a vangin an kalsan thianglo a ti. "MNF te hi Hnam tana Martarte chawimawi leh zah tlat thin, hmusit ve ngailotu kan ni a, an thisen luangin vawiin hi min thlen a ni tih nghet taka vawng a, chawisang tlattu kan ni," a ti. 

Resource Person V.L.Krosshnehzova, General Secretary, MNF Gen. Hqrs. pawhin thu sawiin, Media khawvelah MNF ten theihtawp chhuah a tan kan lak mar pat reng a tul thu leh khawvel lo thang zelin hmanrua min rawn chhawp hi a taka hmang tangkaitu kan nih zual zel a tul a, a titu tur bik awm tlata ngai lova, MNF tawh phawt chuan kan phak tawka ṭan kan lak a tul thu leh ram hruai turin MNF tluka ṭha party dang an awm loh thu a sawi bawk.