July 19, 2023; Silchar-a hmunpui nei Meitei pawl pakhatin Mizoram an vau hnu-ah Silchar Mizoram House-ah venhimna khauh leh zuala kalpui a ni a, boruak duhawmlo thleng a awm lo nia thudawn a ni. Hetihlai hian Metei ten Assam atanga Mizoram mamawh lakluhna kawngpui dan chah an tum chu an thulh.

Silchar Mizoram House Deputy Resident Commissioner (DRC) S. Kaptluanga chuan Inrinni khan thupek chhuahin Mizoram House chhunga lut turte reng reng chuan duty-te hnenah tunge an ni tih finfiahna chiang tak an entir tur a ni a ti a. Duty officer leh Assistant Resident Commissioner lungawina tura mahni nihna tihchianna neite chauh Silchar Mizoram House chhungah luh phal a ni dawn a ni. He thupek hi hman nghal tur a ni a, thu leh awm hma atan chuan kalpui tur a ni bawk.

DRC chuan hetiang ang vehimna hi a hma pawh a an tih tihphung panngai a ni tih ZALEN a hrilh a, chumi ang chuan tunhnai ah venhimna an tikhauh niin a sawi.

Hetihlai hian Silchar Mizoram House tual vel hi tuilianin a chim nasat avangin Inrinni atang vek khan mikhual thlen theih a nih loh thu DRC hian thuchhuah a siam bawk.