Aizawl January 5, 2024 : Traffic Senior SP chuan thuchhuah siamin Lirthei siamtu company-in a siam dan niloa mahni duh dana lirthei tihdanglam (modify) chu The Motor Vehicles Act, 1988 Section 52-in a khap avangin Sawrkar atanga phalna nei lova lirtheite tidanglam lo turin lirthei neitute a hriattir a, man an nih chuan Rs. 10,000 chawitir theih an ni.

Company-in an vuahsa nilo Silencer (after market/modified silencer) hian midang hriat hrehawm khawpa ri bengchheng a siam mai bakah; kum upa leh damlote tan ri bengchhengte hi tawrhhlelhawm tak a ni. Traffic police te chuan Aizawl khawpui chhungah a bik takin Two-wheeler neituten phalna nei lova Silencer thlak leh tidanglam a awm an ti.

Traffic lam chuan Two-wheeler te tan 80 dB (A) aia ring pe chhuak thei silencer hman a khap tlat a, dan bawhchhiate chu Rs. 10,000/- thlenga chawi theih a ni, an ti. Phalna nei lova lirthei silencer lo thlak hi dan bawhchhiatna langsar tak a nih avangin uluk taka enzui leh tirem tura theihtawp chhuah an tum. Traffic Police duty awm lohna hmunah hetianga dan bawhchhiate chu an lirthei thlalak leh lirthei number-te Traffic Control Room Phone number - 0389 2313061 (Call) leh 9366553559 (Call/whatsapp) ah te hriattir thin turin an ngen a ni.

Sawrkar atanga phalna nei lova lirthei silencer lo thlak leh lirthei nihphung tihdanglam avanga man te chu The Motor Vehicles Act, 1988 Section 177, 179 leh 190 (2) hmanga chawitir (fine) zel an ni dawn a ni. Lirthei neitute zingah danin a phal loh silencer ri ring chi lo vuahte chu company-in a vuahsa (stock exhaust)-a thlak leh vek turin an ngen bawk.