ZALEN April 7, 2025 : Mizoram Pradesh Congress chuan vawiin khan Congress Bhavan-ah Political Session an hmang a, he hunah hian MPCC Secretary Rosiamngheta, AMC Corporato chuan thu sawiin, "Smart City aiin Smart MLA kan mamawh zawk a, mimal that falna aiin vantlang that tlanna kan mamawh zawk bawk," a ti.

Rosiamngheta chuan, "Smart city aiin smart MLA kan mamawh, a reltute kan smart hi he ram hmasawnna atan hian a pawimawh. Kan hotuten thil an tiam zung zung a, changkang takin thil kan sawi a, a tak ram kan thleng zo leh si lo a, kan system hi ennawn a ngai a, mimal a hlawkna tur te hi kan um lutuk a, mimal dinhmun that falna aiin kan khawtlang that tlanna ram hian kan mamawh zawk," a ti.

AMC Corporator chuan ram a him lo nia sawiin, "Kan ram kan khawtlang te hi a him lo em em tunlai ah ralthuam nena kawtthlera vak vantlang ti ralkhel tak tak thawmte kan hria, kan khawtlang kan nunaute hi kan venhim a, an sahimna kan ngaituah a ngai a ni.

Health Care chungchang sawiin, "Health care te pawh kan han siam a, pay scale leh deposit a zira package hrang te hi a dik ber em ngaituah a ngai. Pay band in awmzia a nei, kan pawisa a zira kan duh package lei theih te hi a tha zawk em? Group A officer leh peon te natna vei hi a senso a inang thei chuvangin ngaituahna uluk tak a kan hman a tul. Kan sawrkar pawisa hi vantlang chhanchhuahna atan kan hmang tur a ni," a ti.

He ramah hian rethei te pawh hi nuamsa in rethei se la, miin a thawhchuah mil tawk a hmuh chuan rethei mahse a hlim. Tel te, dal te thleng hian ration a sem dan hi ngaituah a ngai a ti a.

Ram changkangah chuan elementary education an ngai pawimawh. A naupang pang enkawl turin mithiam thiam an dah. Sawi tur tam tak zingah health care tha te, zirna tha te hi mamawh hmasa a ni, a ti bawk.