Aizawl August 29, 2022 : Save Mizoram Rivers (SMR) chuan Sairang leh Khamrang inkar kawngpui (NH54) sira bawlhhlawh paih ruk a ni thin hi pawi an tih thu an sawi a. Helai kawng sira bawlhhlawh paih te chu Tlawnga a luh thlak nghal thin avang leh ram dang khualzin te veivah tamna a nih avangin hriselna khawih chhetu leh Mizoram hmel tibaltu-ah an ngaih thu an sawi. 

SMR chuan nimina Aizawl Press Club-a Chanchcinthar thehdarhtu te an kawm naah, Sairang leh Khamrang khaw inkar kawngpui sira bawlhhlawh paih ru ţhin hria leh hmu te chuan a rang thei ang bera Sairang Police Station (0389-2568209)-ah emaw, Kawnpui PS (03837-266459)-ah emaw report nghal vat zel turin mipuite an ngen. Helaia bawlhhlawh paih ru thinte man chhuah kawnga thuneitute puitu chu Save Mizoram Rivers hminga lawmman pek an tum thu an sawi.

SMR chuan Kolasib District Magistrate John LT Sanga'n Kolasib huamchhung, NH54 kawngpui sira bawlhhlawh paih khapna Order, August 23, 2022 a chhuah leh Aizawl District Magistrate Dr. Lalhriatzuali Ralte-in Sairang leh Khamrang inkara bawlhhlawh paih khapna Order, August 225, 2022-a chhuah a ni chu lawmawm an tih thu an sawi bawk.