Social media company-te ‘Indian variant’ tih paih vek turin ti

Admin - May 23, 2021

IT ministry chuan World Health Organization (WHO)-in a chi thar, B.1.617 tia an sawi leh ‘Indian’ an sawi zawm chu dik lo (false) a ti

India sorkar chuan social media company-te chu Covid-19 hri chi thar, ‘Indian variant’ tia an sawi chu an platform-a tar chhuah (post) zawng zawng paih (remove) vek turin a ti.

IT ministry chuan World Health Organization (WHO)-in a chi thar, B.1.617 tia an sawi leh ‘Indian’ an sawi zawm chu dik lo (false) a ti bawk.

Coronavirus hi a chi insiam danglama a thar chhuakte hi an hmuh chhuahna ram hmingin an sawi mai zel a. Hetiang hi UK leh Brazil-ah pawh a awm.

India sorkar hi Covid-19 hripui a hmachhawn danah sawisel tawk nasa tak a ni mek bawk.

Thla hmasa pawh khan Twitter hnenah sorkar hian hripui beihna kawnga a chet dan fuh tawk loh tar lanna chu paih turin a lo ti tawh a, sawi zui a hlawh hle.

India hi a chi thar hian March thla tawp atang khan a nuai na hle a, tunah hian United States tih lohva a kai an tamna ber niin Johns Hopkins University chuan mi maktaduai 26 chuangin an kai tawh niin a chhinchhiah.

Covid-19 kaihhnawiha thi pawh mi 3,00,000 dawn an awm tawh a. US leh Brazil dawta tam berna an ni tawh chungin mi thiam tam tak chuan a tak takah chuan hei aia tam hi an nih an la ring.

Social media company-te hnenah electronics & information technology-in hriattirna a tihchhuah hi Zirtawpni kha a ni a. Vantlangah puan zuar ni lo mah se news agency-ten an puang thung.

Press Trust of India chuan social media platform-te chu ‘hming, inzawmna nei leh ‘Indian variant’ langte chu paih nghal vek turin a ti’ niin an tar lang.

“Online hmangin thu dik tawk lo thehdarh niin ‘Indian variant’ hi ram tam takah a darh nia tar lan a ni a. Hei hi A DIK LO,” tiin an ziak niin Agence France-Presse chuan a tar lang bawk.

WHO-in ‘Indian variant’ tia a sawi leh B.1.617 chuan inzawmna a nei lo niin an tar lang bawk.

Social media executive chuan ‘Indian variant’ tia inziak zawng paih vek chu thil hautak a nih thu Reuters hnenah a sawi.

Inkai awl zawk, B.1.617 hi nikum khan India-ah hian hmuh hmasak ber niin ram tam takah a darh tawh a. Ram tam takin India atanga an rama luh an khap phah.

India hi social media company-te tana hmun tha a ni a. January thla khan Twitter hmangtu tam ber pathumna a ni phak.

India sorkar hian kumin hian social media hman sual leh thu dik tawk lo thehdarh awm thin tihtawp a nih theih nan inkaihhruaina a siam tawh bawk.

Share now