Taliban hian Afghanistan pum deuh thaw an thunun tawh a, sorkar thar pawh an din thei tep tawh.

European Union leh UK chuan United States zawmin Zirtawpni khan Islamist pawl hi an thawhpui dawn tih an puang a; mahse, Afghanistan sorkar ang erawh chuan an pawm dawn lo.

EU hian ram dang mite hruai chhuah hna thawh zui zel nan Kabul-ah hian palai tirh leh an tum tih an sawi bawk a. Hetih rual hian Afghan sorkar thar chu venhimna leh mihring dikna chanvo humhalh kawngah a intiam anga a awm an phut thung.

Foreign affairs chief Josep Borrell chuan Afghan mite lamah an tang zel dawn a, eng emaw tha lo a awm chuan an ngaihven thuai zel dawn tih a sawi.

Taliban-te hian khawvelin an kaihhruai sorkar chu an pawmpui an duh hle a, hemi tur pawh hian theihtawp an chhuah niin Kabul-a awm chanchinbumi pakhat chuan a sawi.

Khawthlang ramten an pawm lo a nih chuan ram lian leh thiltithei dang - China, Russia leh Pakistan lam hawi an tum sa bawk niin a sawi bawk.