Aizawl June 17, 2023 : National Legislators Conference hmanga Mumbaia cham mek Mizoram Assembly Speaker Lalrinliana Sailo chuan vawiin khan Mumbai Mizoram House a tlawh a. Dy. Resident Commisioner H. Lalruatliana chuan damlo te nena inkawmna hun a lo buatsaih a. Speaker chuan Cancer hmuh chhuah hma a a nih theih nana early detection drive kalpui tura hmalakna a beisei anga a hlawhtling lo chu pawi a tih thu a sawi.

Lalrinliana chuan kum 2005 ah Mumbai Mizoram House hawn a lo ni tawh chu hruaitu hmasa ten theihtawp an lo chhuah vang a ni, tiin ram tana an thahnemngaihna chu chhuanawm a tih thu a sawi a. Mizoramah cancer vei an tam avangin Health Minister a nih laiin cancer vanga thihna tihniam turin theihtawp chhuah a nih thu leh hemi atan cancer tamna ram Japan-ah Mizo Surgeon 2 tirh an ni tih a sawi a. An lo haw hnuah cancer phaia thawn pawh nasa takin a tlahniam a ni, a ti a. Cancer enkawlna kawngah natna hmuh chhuah hma a pawimawhin hemi atana early detection drive kalpui tura hmalakna chu beisei angin a hlawhtlin loh avanga pawi a tih thu pawh a tarlang a ni.

Rinliana chuan Mumbai Mizoram House hnathawkte chu damlote tana an inpekna leh Mumbaia Mizo awm ten harsatna an tawh changa an buaipui thin danah fakawm a ti a. Milian mite thliar lova damlo te an hmasak dan indawta accomodation pek an ni thinte chu tha a tiin mite tana malsawmna lo ni zel turin a chah a. Damlo te tan a tul tula  hman atan Damlo Welfare Committee hruaitute hnenah Rs.30000 a hlan a. Tawngtaina hun a hmang nghal bawk a ni.

Dy. Resident Commussioner Lalruatliana pawhin thu sawiin Speaker in House a tlawh avangin lawmthu a sawi a. Mumbai Mizoram House dinhmun leh, accomodation indaihlohna avanga harsatna an neihte, helai buildinga cheng ve hnamdang te leh Mizote inkara harsatna neih thinte Speaker hnenah hian a lo thlen a ni.

Speaker hi a nupui Lalthangpuii leh MLA 2, Nihar Kanti Chakma leh B.D.Chakma te bakah official ten an tawiawm a. Speaker hi National Legislators Conference-a thematic planary session pakhat ah Special Guest niin hun a hmang a ni.