Sri Lanka-a police-te chuan a ram puma chawlhkar khat chhung ruihhlo tawlhtute dap beihpui an thlakah mi 15,000 dawn an man.

Beihpui thlakah hian heroin telin ruihhlo chi hrang hrang kg 440 vel an man bawk.

Tual chhung chanchinbute chuan officer-ten Colombo leh hmun dang danga ui fing nen mi an dap lai thlalak leh video te an tichhuak.

Mihring dikna chanvo humhalhtute chuan phalna tel lovin mi an dap nia sawiin dan kalh a nih thu an sawi.

Police thupuangtu erawh chuan ruihhlo check tur hian phalna (warrant) neih kher a ngai lo niin BBC hnenah a sawi thung.

Thuneitute chuan beihpui thlak chhung hian rinhlelh mi 13,666 a man a, ruihhlo ngai 1,097 lai sipai enkawl rehabilitation centre-ah dah an nih thu an sawi.

Dan bawhchhia nia rinhlelhte lirthei leh an thil neih dangte pawh mansak an ni tih an sawi bawk.

Dikna chanvo humhalhtute chuan mi rethei leh hnuaihnungte chauh bitum an ni tih an sawi ve mek.

Mi thiamte chuan Sri Lanka hi ruihhlo tawlhtuten hmunpui atan an hmang niin an sawi a. Heroin, hashish, cannabis leh a dang dangte hian an ram pum a kaltlang thin niin an sawi.

Thuneitute chuan Krismas laiin an chawl ang a, karlehah beihpui an thlak chhunzawm lehnghal dawn tih an sawi.

Sri Lanka-a tum khata ruihhlo a man tam ber chu December, 2016-a heroin kg 800 an man kha a ni.