Aizawl; Central YMA President R. Lalngheta chuan Supply Reductioin Service (SRS) din leh turin mipui nawrna a nasa tih sawiin, Myanmar atanga kan unau raltlan rawn lutte chu ruihhlo rawn kenglut lo turin a ngen tih a sawi.

ZALEN in a biakna ah Central YMA president chuan, ruihhlo do tur SRS din leh turin ngaihtuahna sen mek a ni tih sawiin, committee ah sawi la ni lo mah se, mipui nawrna a nasat avangin din leh turah an inngai tih a sawi. "Din a nih hun tur la sawi theih loh mah se, YMA day chho vel ah kan din thei ang em tih te rilru ah chuan a awm," a ti.

Thil tam tak ngaihtuah ngai leh venthawn tur a awm vangin SRS din turin hmanhmawh vut vut remlohna a awm tih sawi bawkin, R. Lalngheta chuan, tunlaiin Mizoramah ruihhlo a tam thu leh a man pawh a tlawm thu a sawi a. 

Ruihhlo bawih a luh tawh chuan chhuah leh a harsa tawh em em a, hemi vang hian Mizo thalaite chu mahni inveng a, ruihhlo laka fihlim turin a ngen tih a sawi bawk.

Ruihhlo zuarte pawh Mizo thalaite sawisa a tichhetu, piansualna leh thihna hial thlentu a nih vangin ruihhlo zawrh sim turin a ngen a, ruihhlo zuartute chu Mizo hnam pawisawitu an nih thu a sawi.

Central YMA President chuan Myanmar atanga Mizoram a raltlan rawn lutte chu kan unaute an nih vang in theihtawpin kan lo duat tih a sawi a, "Tha takin kan lo kuangkuah a, amaherawhchu ruihhlo rawn keng kher suh se, an rawn keng zel a nih chuan kan rilru te pawh an tihnual ang tih a hlauhawm," a ti bawk.