Sorkar laipui chuan Covid-19  leng thawh thumna  thleng leh thei inhmakhuaa hma a laknaah state 10 chu a kai punna leh endik zinga a kai hmuh chhuah tamna a nih thu a sawi a. Heng hmunte hi inkhuahkhirhna kalpui tul a tih thu a sawi bawk.

Sample endika a kai hmuh zat, positivity rate 10% chung lam nihnate hi sorkar chuan a ngaimawh a. Inkhuahkhirhna kalpui piah lamah kum 60 chung lam leh kum 45 leh 60 inkarte hri laka invenna damdawi pek kalpui chak turin a ti. 

Kerala, Maharashtra, Karnataka, Tamil Nadu, Odisha, Assam, Mizoram, Meghalaya, Andhra Pradesh leh Manipur te chu tun hnaia Covid-19 kai tamna emaw, positivity rate sanna emaw a nih thu union health ministry chuan a sawi.

District 46-ah positivity rate 10% chung lam la awmin district 53 chu 5-10% inkarah an awm a. Heng state awmnate hi endik titam turin tih an ni bawk.

“Heng district-ah inthlahdul hian thil tha lo tak a thlen thei a ni,” a ti. 

India rama hri leng dinhmun hi Inrinni khan Union Health Secretary Rajesh Bhushan-a hovin ennawn a ni a. Hetah hian Indian Council of Medical Research (ICMR)-a Director General Dr Balram Bhargava pawh a tel a, state hrang hranga hriselna lama thuneitute an tel bawk 

“Positivity rate 10% chung lam la ni hi chu inkhuahkhirhna khauh taka la kalpui an ngai a, mipui chevel ven te, pun khawm theihna siam loh te leh hri a darh lohna tura mipui ven a la ngai a ni,” tiin sorkar thuchhuah chuan a tar lang.

Hri kai dinhmun a la chhiat zualna state 10-a a kai enkawl lai mek zinga 80% chu an chenna ina inenkawl mek an ni hlawm a. Ina inenkawlte hian mi dang an kai darh lohna turin tual chhung thuneituten khauh takin thil an kalpui tih sorkar hian a sawi bawk. 

“Ina inenkawlte hi uluk taka vila damdawi in panpui an tul a nih pawhin a hunah tak thlenpui tur a ni,” tiin health ministry hian thu a chhuah bawk.

Inrinnia sorkar leh mi thiamten hri leng dinhmun an thlirnaah hian India-ah hri leng chi thar a lut em tih fiah nan INSACOG (Indian SARS-CoV-2 Genomics Consortium) laboratory network chu ram dang atanga khualzin lut tharte en nan hmang turin state-te chu chah an ni. 

India-ah hian April-May vel  khan hri leng thawh hnihna na tak thlengin oxygen indaih lohna a nasa hle a. Hei vang hian mi mal damdawi inte chu PSA (Pressure swing adsorption) oxygen generation plant bun theuh tura tih an ni. 

COVID-19 leh India dinhmun

India chuan invenna damdawi pek lamah mellung thar phunin mi vaibelchhe 46 a pe tling ta a. Hetih lai hian darkar 24 liam ta chhungin mi 41,649-in hri hi kai leh hmanin mi 593-in an thihpui bawk a. Mi nuai 4.23 chuangin an thihpui ta.

Kerala chu a thawh hlawk ber nih chhunzawmin mi 20,772 zet kai hmuh chhuah an awm leh a. Chhim lam state hi ram puma hri kai enkawl lai 37% chuang awmna a ni mek tih sorkar chuan a sawi.

Hri leng tuar na ber, Maharashtra-ah chuan mi nuai 62-in Covid-19 hi an kai tawh a, darkar 24 liam ta chhungin mi 6,600 chuangin an kai leh hman a.  Andhra Pradesh-ah mi 2,068 leh Tamil Nadu-ah mi 1,947 an awm bawk.

India-ah hian ni riat liam taa ni sarih kha hri kai a pung zawngin a kal a. Zirtawpni khan mi 44,230-in an kai tih chhinchhiah belh niin chawlhkar thum chhunga a tam ber tum a ni a. Mi vaibelchhe 3.15 chuangin an kai tawh niin health ministry chuan a chhinchhiah.

May thla laihawla a thawh hnihna vang lai khan ni khatah mi nuai li chuang kai hmuh chhuah an ni a, state eng emaw zatin inkhuahkhirhna kalpuiin a ziaawm hle tawh a; mahse, tun hnaia kai danah thawh thumna a thlen hlauhthawn mek a ni.