Aizawl: Mizoram khawchhak Myanmar-ah vawk hri leng a awm avanga vawk lakluh khap anih hnuah state dang atangin vawk 600 vel lakluh a ni tawh.

Zalen palaiin AH & Vety department thawktu te hnen atanga thu a dawn danin Myanmar a Shan state ah vawk natna hri hlauhawm African Swine Fever hmuh anih avang leh he hri in Mizoram a luh loh nan Myanmar atanga vawk lakluh chu khap a la ni reng tih an sawi a. Hetih lai hian Mizoram mipuite vawksa an mamawh avang-in state dang Uttar Pradesh leh Punjab state atangin vawk dam tha lakluh a ni a, hriattheih chinah vawk 600 vel lakluh a ni tawh.

AH & Vety thawktute chuan state dang atanga vawk lakluh te chu an hriselna dinhmun te Vairengte ah an endik leh vek niin an sawi a, an hriselna dinhmun bakah vaccine an lak hun te uluk takin an enfiah niin an sawi bawk.