Supreme Court chuan nimin khan coronavirus hri leng avanga ram puma oxygen indaih lohna a awm mek avangin, a sem darh lam enpuitu tur, mi 12 awmna task force a din.

Justice DY Chandrachud-a kaihhruai bench chuan task force hi dinin oxygen sem darh dan kalphung, a mamawhtu zawng zawng an vil dawn a ni.

Court-in a din task force hian oxygen bakah vantlang hriselna dinhmun chungchangah science thiamna hmanga finfiah thil - damdawi mamawh zual, thawktu leh thingtlang lama inenkawlna zawng zawng an vil tel ang.

Task force-ah hian doctor 10 bakah convener a awm a, ani hi sorkar laipuia cabinet secretary a ni dawn a. Health ministry-a secretary chu member a ni bawk ang.

Supreme Court hian Delhi sorkarin oxygen a sem kual dan vel chu a endik dawn bawk a. Endik (audit)-tu turte hi Dr Randeep Guleria, Dr Sandeep Budhiraja leh IAS officer an ni dawn a. Anni hi sorkar laipui leh Delhi sorkar aiawh an ni.

Tar lan fo tawh thin angin India-ah hian Covid-19 thawh hnihna lengin ram a tibuai a, khawpui liana damdawi in tin deuhthaw chuan oxygen an inchan lo va, damlo tam tak an thih phah tawh.

Delhi damdawi in liante chu thla hmasa khan Supreme Court leh Delhi high court-ah zualkovin  oxygen an tlakchham avanga damlote thihna an thlen a, ngaihtuahsak turin an ngen.