ZALEN January 1, 2025 : LBS Suzuki-in 40,000 chuang an hralh hnuah Inrinni hian Millennium Centre tual, Dawrpui-ah Suzuki Access 125 gearless scooter thar an tlangzarh.

January 17 khan Bharat Mobility Global Expo, Delhi-ah Indian mipui hmuh theihin pho chhuah a ni tawh a; LBS Group Board member Joseph Lalthanpuia leh Info Bikes chief test rider Vanlalmuana'n Mizoramah khuh hawngin mi 10 hnenah an pe chhuak nghal.

Muantea chuan, "2006 khan India ramah Suzuki-in Access 125 a tichhuak a, a hlawhtlinpui viau rualin Mizoramah hralh a kal em em a ni. A hlawhtlin chhan chu a zuartu LBS vang a nih bakah a pianhmang a ler lo va, tute pawh mil turin rawng hran hran a awm a, engine a tlovin kawng chhova inphurh nan mi a zo tha a, petrol a ei na lo hle bawk a ni," a ti.

November 30, 2014 khan Bawngkawn, Aizawlah LBS Suzuki showroom hawn a ni a, June 2000 thlengin Access 21,000 an hralh chhuak hman. Kum eng emaw zah kal ta atangin Mizorama lirthei hralh tam ber an ni a, thla khatah chawhrualin 700 atanga 800 vel an hralh a, heng zinga 80% hi Access a ni.

Muantea chuan Mizo mipuiin an duh em em Access khan changkang leh tha zawkin an thuam a, tuna a chhuak thar hi 'a seat a sei hret a, a hma aia a ruh hret avangin rei tak chuan nan a nuam zawk' tih sawiin, "A pianhmang pawh an tidanglam a, a hma aia zen zawk a nih avangin a hnunga chuan a nawm phah.

"A ke hma leh hnung inhnaih zawka an siam avangin khalh leh kual a nawm phah a, a chhuata gas bur leng sa tawh kha an tilian leh zual a, a hma aiin a headlight a eng a, petrol litre 5 thun theih thin kha 5.3-in an tilian bawk.

"Pawimawh em em chu brake fail awm thei tawh lo turin a thunun nan khawl lian tha zawk an hmang a, engine tlo tha tak ni sa mah se a aia chak leh changkang zawk a hmang bawk. Kawng hrang hrangah a hma aia tha zawk tur zela thuam a ni a, a that loh zawkna lai tur hmuh thiam a har hle a ni," a ti.

A man erawh a chhuak hmasa nen a inang deuh reng a, Rs 1,18,867 (on-road price)-in a lei chhuah theih. Combustion engine hmang bakah hian Suzuki chuan battery hmang electric Access an tichhuak bawk a, LBS chuan Mizoramah March velah hralh chhuah hman an inbeisei.

LBS chuan Suzuki two-wheeler dealer an nih atanga January 2025 thleng, kum 10 leh thla hnih chhungin Access 40,000 chuang an hralh tawh tih an sawi a, Mizoramah hetiang taka lirthei model pakhat zinga hralh chhuah hnem a awm lo.

Chutih rualin Mizoramah mi nuai 13 vel cheng anga ngaih a ni a, chawhrualin mi 32 zelin Access pakhat intawm anga chhut theih a ni.