Afghan nunau an khawngaihthlak

Afghanistan-a Taliban-in ram an lak leh duai duai lai hian Afghan nunau tam tak chu sipaite kuta an him theihna awmchhun nia an hriat, Kabul-ah an tlan lut nasa hle a. An khawpui berah hian ei leh in tur an tlachham nasa tawk a, mangang takin an awm a. |henkhat chu khawlaiah an riak a, kudam hluia awm tam tak an awm bawk.

Kabul bul lawk, Parwan atanga a laizawn pahnihte nena tlan lut, hmeichhia kum 35 mi, Muzhda chuan a hma bak chu a huphurh thu a sawi a. “Nileng zankhuain ka tap a ni mai,” tiin AFP a hrilh a. “Pasal nei tura sawmna ka lo hnawl tawh a. Taliban an lo kal chuan nei turin min ti dawn a, ka intihlum mai ang,” tiin a sawi.

UN Secretary-General Antonio Guterres chuan Taliban-ten ram an lakna hmun apiangah hian hmeichhiate an tiduhdah thei hle chu tha lo a tih thu a sawi a. Islam sakhaw la run pawl, Taliban hian Afghanistan-ah hian kum 1996-2001 khan ro an lo rel tawh a, hetih lai pawh hian hmeichhiate an en hniam thin hle.

Afghan President Ashraf Ghani chuan Taliban-ten an khawpui ber pawh an hnaih mek zel laiin an sipaite thuam chak chu a ngaih pawimawh hmsak ber a nih thu a sawi.

President hian a bân dawn emaw, an rama indona thleng mek chu a mawhphurhna a ni tih lam emaw engmah a sawi lo va; mahse, indona titawp tura inrawn erawh neih a nih tur thu a sawi thung.

“Venhim hna thawktute tuaithar hi kan tum lian ber leh kan hmalakna hmasa tur a ni,” tiin Afghan hnam puanzar bula thua TV-a mipuite hnena thuchah a sawiah a sawi.

Ghani-a sorkar hian  tun hnai hun reilo te chhungin Afghanistan-a an rorelna hmun tam tak chu an chân tawh.

President-in an sipaite tuai hnum tum a nih thu a sawi mek lai hian US Marines chu Afghanistan-ah hian let lehin Afghanistan leh embassy hrang hranga ram dang mi thiar chhuahnaah a pui dawn.

Taliban kutah hian an khawpui lian ber dawttu leh a pathumna chu a tlu leh tawh a. An khawpui ber, Kabul chu sorkar sipaite hmun lian chan chhun ni deuh mai tawhin an dinhmun a chau tawh hle.

Helho hi hi khawpui atanga km 50 vel chauhva hlaah an awm tawh a, hetih lai hian US leh ram dangte chuan thlawhna hmangin an mite an hruai chhuak mek zel bawk.

Mazar-i-Sharif chhehvelah pawh inkahna a thleng reng a. Hmar lama he khawpui hi indo mi leh vice president hlui, Abdul Rashid Dostum-a huhang ngahna niin Taliban dotu hel tamna a ni.

Tun dinhmunah hian Jalalabad, Gardez, leh Khost te chu sorkar chan zinga khawpui lian deuh a la ni a. Hengte hi Pashtun hnam tamna a ni.

Kabul khawpuiah chuan US embassy-a thawkte chu thil pawimawh deuhte hal leh tisawm tura hriattir an ni tawh a. American sipai 3,000 rual lut tawhin thlawhna tumhmun leh inthiar chhuakte an veng ang.

European ram hrang hrang - Britain, Germany, Denmark, Spain leh a dangte pawhin an embassy-a mite chu Zirtawpni atanga chhuak turin an ti bawk.

Taliban-in hma an sawn chak lutuk hi Afghan leh US kaihhruai tangrualte pawhin mah an ti a. Kum 2001-a an chhut tlawm hnuah tun hnaiah ram dangten an chhuahsan mek laia an kal chak dan hian a barakhaih ve deuh.

President Joe Biden-an an ram atanga inthiar chhuah tur a puan hnu lawkah khan Afghan sipai eng emaw zat chu Taliban an ralthuam leh lirthei bakah an tuialhthei nen an inpe a. Hei hi hel pawl tichaktu pakhat nia ngaih a ni bawk.

Taliban an len mek zel lai hian Biden-a sorkar hian an inthiar chhuah tum chu an titawp dawn lo tih a sawi a.  Taliban-in thuneihna an chan pumhlum a rem a ti lo bawk.

Taliban hian kar kal ta tir lamah khan hmar lama Herat an la a, a hnu lawkah Kandahar an la zui leh a, hei hi chhim lama khawpui lian ber pakhat a ni.

Logar province khawpui, Pul-e-Alam chu Zirtawpni khan  an la leh tawh bawk a. Hei hi Kabul atanga hla lo tak a ni tawh.

Province khawpui 34 an neih zinga a zahve dawn chu Taliban kutah hian a awm tawh a. Hma an sawn danah reilo teah a tam zawk an lak belh zel rin a ni.