Taliban-ten Afghan khawpui lian an hnaih zel, indona thleng nasa
Afghanistan chhim lam leh khawthlang lama khawpui lian pathum chu Taliban-ten sorkar sipai kut atanga chhuhsak tumin nasa takin an bei mek.
Taliban fighter-te hian Herat, Lashkar Gah leh Kandahar khawpui thenkhat chu an lut tawh.
Hel pawl hian September thlaa ram dang sipaiten an chhuahsan vek dawn lai chu chuhin thingtlang lam ram zau tak chu an la tawh.
Khawpui liante erawh an la la em lo va, an buai mek zel avang hian nunauten an tawrh nasat hle rin a ni a, sorkar sipaite hian eng chen nge helho hi a dan theih dawn hriat a ni lo.
Islamist helho hian Afghanistan ram zahve vel chu an thuhnuaiah an dah leh tawh nia ngaih a ni a, heng zingah hian Iran leh Pakistan nena an inkalpawhna khaw pawimawhte pawh a tel.
Kandahar-a MP pakhat chuan an khawpui chu a tlawm tep tih a sawi a. Mi sang tam tak tlanchhiain mangang tak tak an tam hle tih a sawi.
Gul Ahmad Kamin chuan an dinhmun chu darkar tin a hniam lam zel a nih thu a sawi a, an khawpuia indona chu kum 20 chhunga a nasat ber tum a nih thu a sawi bawk.
Taliban-te hian Kandahar hi an lak tum lian ber niin MP chuan a sawi a, an khawpui lailawk atan an duh nia a ngaih thu a sawi a. An tlawm a nih chuan a bul hnaia province panga paruk vel chu an chhuhsak nghal a nih tur thu Kamin hian a sawi bawk.
Taliban fighter-te hian khawpui hmun thenkhat chu an la tawh a, civil mi an la tam avangin helho hian khawpui an luh tak tak hma chu sorkar sipaite hian ralthuam lian tak tak an la hmang ngam lo.
United States leh a tanrualpui Nato leh ram dang sipaiten Afghanistan hi November, 2001 khan rûnin Taliban thuneihna an chhuhsak.
An pawl hi September 11, 2001-a US beihnaa mawhphurtu, Osama Bin Laden leh al-Qaeda hel pawla mi langsarte inhumhimna nia hriat a ni.
An sipaite an lak chhuah dawn thawm a awm atanga indona a chhuah avang hian ram dang tam tak chuan an nawr zui a, hei vang hian Afghan sipaite puihna turin dollar tam tak pek a tum.
February, 2020 khan khatih laia US President Donald Trump-a khan Taliban hi inremna siampuiin Afghanistan atanga sipai lak chhuah a tum.
Kuminah hian President Joe Biden chuan tum zui zelin September-a lak chhuah vek a tum.
Herat & Lashkar Gah
Herat - Herat khawpuiah hian Tolo News reporter chuan indona a nasa hle tih a sawi a, Taliban fighter-te chuan khawpui chhim lam, sumdawnna hmunpui ni bawk chu an lut tawh niin a sawi bawk.
Khawpui chhung hmun ngaah inkahna a thleng mek.
US chuan Afghan sipaite hi thlawhna atangin a la pui chhunzawm reng a, district chhehvela thlawhna tumhmun pawh an lak letsak tawh.
Zirtawpni khan tumhmun bula UN compound vengtu chu kah hlum a ni a, hei hi UN chuan Taliban helho beihna ngei a nih thu an sawi.
Herat khawpuia chengte chuan hmun tlem te chauh him a awm niin an sawi a, mi thenkhat chuan ralthuam chuh vein khawpui chhan tumin an thawk chhuak ve niin an sawi bawk.
Sipai commander thin, kum 1980 chhova Soviet sipaite pawh lo do tawh, Ismail Khan chuan an khawpui chhan nan sipai pawl a din.
Lashkar Gah - Chhim lama Helmand province khawpui, Lashkar Gah-ah pawh helho hi an lut thuk hman tawh hle a, khawpui laili atanga km hnih vel chauhva hlaah an awm hman tawh a; mahse, Zirtawpni zan zankhua khan sipaiten tan an laknaah an tikir leh hret.
Afghan sipai commander chuan helho hi an thi nasa hle niin a sawi.
Tual chhung mi thenkhatte chuan Taliban-te hian Zirtawpnia hma an sawi vak lai khan governor pisa pawh an thleng hman tep niin an sawi a, nawr kir leh hret erawh an ni.
Latest News & Chhiar Hlawh
-
1m | Mar 29, 2024
-
1m | Mar 29, 2024
-
2m | Mar 28, 2024
-
2m | Mar 28, 2024
-
1m | Mar 28, 2024
-
1m | Mar 28, 2024
-
1m | Mar 28, 2024
-
1m | Mar 27, 2024
-
2m | Mar 27, 2024
-
1m | Mar 27, 2024
-
2m | Mar 27, 2024
-
1m | Mar 27, 2024
-
1m | Mar 27, 2024
-
1m | Mar 27, 2024
-
1m | Mar 26, 2024
-
1m | Mar 26, 2024
-
1m | Mar 26, 2024
-
1m | Mar 26, 2024
-
1m | Mar 25, 2024
-
1m | Mar 25, 2024