Taliban hel pawl chuan Indian mi 150 chu Inrinni tuk khan thu zawh fiah turin an la a; mahse, chhuah lehnghalin Kabul thlawhna tumhmunah an awm leh tawh a, ram buai mek, Afghanistan atang hian India chuan hruai haw tumin hma a la zui mek.

Indian-te hi Kabul tumhmun pawnah hruai haw theih an nih hun nghaka an awm lai mekin an bul lawka police station-ah helho hian thu zawh fiah tur leh an zinna atana lehkha pawimawh an kawlte endik turin an hruai hrang niin India sorkar-a hotu lian pakhat chuan NDTV a hrilh.

He thil thleng hi India chuan a ngaihven hle a, tual chhung chanchinbu thenkhat chuan ‘ruk bo’ angin an chhuah hman hial.

Hetiang thil sawi a nih hma hian Kabul-a thuthar thehdarhtu pakhat chuan Taliban hian mi 150 chuan an ru bo va, an zingah Indian an tel niin a tar lang.

He thil hi Taliban chuan an pha nghal vat a. Kabul-a The New York Times tana thawk, Sharif Hassan chuan Taliban thupuangtu hnen atangin hetiang thil a thlen loh thu a dawng tih Twitter-ah a tar lang.

Taliban-te hian Indian-te an hruai hran hi Air Force thlawhna hmanga Kabul atanga Indian 85 phurh chhuah an nih hnu lawka thleng a ni a. Thlawhna hian him takin Tajikistan a thleng tawh a, thlawhna dang inring sa chu Kabul-ah hian tirh luh leh tum a ni bawk.

India sorkar hian Kabul-a Indian la awmte chu an him theih nan a rang thei bera hruai haw tumin a beih chhunzawm zel.

Taliban-te hian Pathianni kal ta khan Afghanistan khawpui, Kabul hi lutin ram pum an thunun zui a. A hma lawkin President Ashraf Ghani chu a tlanchhia a, Kabul an luh hian lo dodaltu pawh an awm lo.

Afghanistan-ah hian kum 20 dawn liam ta khan Taliban-te hi United States leh a tanrualpui ram dang sipaiten paih thlain mipui rorelna a ding a. Tunah hian ram dang sipaite hi an inthiar chhuak leh tawh a, hetih lai hian tan la tharin hun reilo te chhungin ram pum an la leh ta a ni.

Tun thla chhunga US-in inthiar chhuah hman vek a tum avangin thla liam ta atangin an chhuak zeuh zeuh tan a, Taliban hian ram zauh ve tan chiahin thingtlang lam an hrut hmasa a, kar hnih liam ta vel atang khan khawpui lian bei zuiin tunah Kabul thlengin an la ta a ni.