Indona Hmun Afghanistan

Taliban helho hi Afghanistan-a rei tak ro lo rel tawh niin kum 2001 khan US leh a tanrualpuiten thuneihna an chhuhsak a. Tunah hian ram dang sipaite hian chhuahsan an tum a, hetih lai hian insiam tharin sorkar sipaite nen nasa takin an indo mek.

Province khawpui pahnih an lak tawh bakah hian khawthlang lama Herat, chhim lama Kandahar leh Lashkar Gah khawpuite chu an la thei hnai tawh hle.

Afghan sipaite hian Lashkar Gah-a an indonaah Islamist fighter tam tak an that tih sawiin an zingah hian an commander hlun tak takte pawh an tel niin an sawi a. Taliban erawh chuan sipaite thu sawi hi an pha ve thung.

Helho hian an dai thuk tawh hle a. Afghan khawpui, Kabul-ah pawh kar liam ta khan President Ashraf Ghani-a thupuangtu thin an that a, bomb hmangin defence minister chenna in an bei bawk.

Indona a nasat em avang hian US leh UK sorkar chuan an khua leh tuite chu an sahimna ngaihtuaha a rang thei ang bera Afghanistan chhuahsan turin a ti.

Zirtawpni khan British Foreign Office chuan helho hian Afghanistan khawi lai pawh an bei thut thei reng tih a sawi.

US pawhin an mite chuan mihring phur thlawhna pangngai an man thei lo a nih chuan repatriation loan an dil theih tur thu an sawi.

Taliban-te chuan Afghanistan hmar lamah Jawzjan  province khawpui, Sheberghan chu an la tih an puang.

Afghan defence ministry thupuangtu chuan sorkar sipaite pawh khawpuiah hian an la awm ve reng a, helho chu an hnawt chhuak thuai dawn niin BBC hnenah a sawi ve bawk.

Taliban-ten Inrinnia khawpui an lak leh hi province khawpui an lak pahnihna a ni a. Zirtawpni khan chhim thlang lam, Nimroz province khawpui, Zaranj chu an lo la tawh bawk.

An ram puma indona kal mekah hetianga khawpui lian an chân hi venhim hna thawktute tan chuan thil zahthlak tak a ni.

Hmar lama Kunduz leh chhim lamah Lashkar Gah khawpui inchuhnaah pawh indona nasa tak a la chhuak mek zel bawk.

Afghanistan-ah hian United States leh ram dang sipaiten kum 20 zet hnua sipai chakna hmanga beihpui an thlakna titawpa an inthiar chhuah \an mek a\angin indona hi a nasa hle.

Taliban hel pawlte hian tun hnaiah ram an zauh chak hle a. A tir lamah khaw tenau deuh la phawtin tunah hian khaw pawimawh leh khawpui liante lam an hawi leh mek.

Sheberghan hi Afghan vice-president hlui leh indonaa hrat khawkheng, Abdul Rashid Dostum-a tantute tamna a ni a, amah thlawptute hi helho beihnaah a thawh hlawk ber pawl an ni.

Tual chhung chanchinbute chuan Afghan sipaite pui tur hian mi 150 an kal niin an sawi.

Taliban-te hian Zirtawpni khan governor chenna (compound) an la tawh a; mahse, Afghan venhim hna thawktute hian an chhuhsak leh.

Hetih lai hian provincial council chief, Babur Eshchi chuan helho hian sipai hmun tih loh khawpui pum hi an thunun tawh tih BBC hnenah a sawi a, sipai hmunah pawh hian indona a la kal mek tih a sawi.

Afghan defence ministry thupuangtu, Fawaad Aman chuan BBC-a Newshour programme-ah khawpuiah hian sorkar sipai an la tam zawk tih a sawi a. Thlawhna tt-umhmunah pawh an la awm tih sawiin Sheberghan-a ‘firfiakte an thian thuai dawn’ a ti.

Aman hian Taliban-te hian khawpui hmun eng emaw zat chu an la tawh tho tih a sawi a, sipaite hi civil mite tawrhna tur veng chunga an tawlhkir phah thu a sawi bawk.

Taliban thuneitute chuan Sheberghan-a tan in pawh an la tih an sawi a. Social media-ah pawh mi tang tam tak an chhuah lai a lang bawk.

Taliban fighter-te hian an thenawm  ram nena an inkalpawhna khuate pawh an la nual tawh bawk.