ZALEN April 6, 2025 : Aizawl Forest Division hnuaia awm, Saitual Forest Range leh Association for Environmental Preservation (ASEP) tangkawp buatsaihin April 2-5, 2025 chhung khan Tamdil Catchment Area-a khaw hrang hrang pali - Tualbung, Dilkhan, Sihfa leh Saitual Chawnpui-ah te Communication & Outreach Programme hman a ni.

ASEP chuan Tamdil tlawhtute dimdawih taka enkawltu leh duattu ni theuh turin a sawm tak meuh meuh a, thawm ri ring chhuah zawng leh bawlhhlawh hnutchhiahtu ni lo turin a ngen a ni.

He programme hi Tamdil Integrated Management Project-a tel niin Tamdil tha taka humhalh a nih theihna tura programme pakhat a ni a. ASEP atangin President K. Lalmuansanga bakah mi pali an thawk chhuak a, Saitual Forest Staff ten an tawiawm bawk.

Khaw tinah public meeting huaihawtin hun hman a ni a, khawtlang mipuite nen Tamdil chungchanga inkawmhona hman a ni a. Tamdil chu khuanu duansa (natural lake) hlu tak a nih avangin a chhiat mai loh nan theihtawp chhuah a tul thu inzirtirna hman a ni.