Myanmar-a mipui sorkar hotu paih thlak tak, Aung San Suu Kyi chu sipaiten February, 2021-a an paih thlak hnua tan ina an hren reng hnuah pawn chhuak thei lo (house arrest)-in a hren chhunzawm dawn ta.

Suu Kyi-i hi Thawhtanni khan Nay Pyi Taw-a sorkar inah dah a ni tih tan in chuan BBC Burmese hnenah an sawi a. An tantirna hmasaah kum khat vel hun a hmang.

Kum 78 mi ni tawh, Suu Kyi-i hi tuma tel ve theih lohva sipai kaihhruaina hnuaia a chungthu relah thiam loh chantir niin kum 33 chhung tang tura hrem a ni.

Kum hnih chuang chhung chu a dinhmunah hian thu thar hriat tur engmah a awm lo tawh.

Lung in atanga sawn chhuah a nih chungchangah hian sipaite chuan engmah sawi an la nei lo va; mahse, house arrest-a an awmtir tur hi sipai sorkar atang chuan thil tha lam a ni a, ram tam takin chhuah turin an lo ngen tawh a ni.

Suu Kyi-i hi a damsam lo nia sawi a awm a; mahse, sipaite hian an pha a. Kar tir lamah khan Nay Pyi Taw-a a tanna thuneitu chuan a hriselna a tha niin BBC Burmese hnenah a sawi.

Thailand foreign minister pawhin tun thla khan Suu Kyi-i hi a tlawh tih a sawi a; mahse, a bak engmah a sawi lo.

BBC Burmese chuan parliament-a rorelna in hniam zawkin Suu Kyi-i leh T Khun Myat te inkawmna tur hi ruahmanna a siam niin a tar lang a. Hetih lai hian sipaite atang chuan an inbia em tih sawina engmah a awm lo.

Sipaiten mipui sorkar an paih thlak atang khan Myanmar-ah hian tual chhung indona chhuakin mi sang tel an thi tawh a. Sipaite hrek ni mah se hei hian tharum thawhna a titawp lem lo.

Nobel Peace Prize pawh lo dawng tawh, Suu Kyi-i hi man a nih hnu atanga house arrest-a dah a nih thleng sipaite tan inah dah a ni.

An puhna hi a pha vek a, mihring dikna chanvo humhalhtu pawlte pawhin a chungthu an rel dan kalhmang chu demin zahthlak an tih thu an sawi.

An ram a indan theih nana beitu langsar, General Aung San-a fanu hi sipai rorelna paih thlaa mipui sorkar din a nih theih nana hruaitu langsar tak a ni a. National League for Democracy (NLD) a din a; mahse, kum 1989 atang khan house arrest-a dah a ni.

Kum 2010-a chhuah zalen a nih pawh khan an ram mai bakah khawvel hmun hrang hrangah lawm taka dawnsawn a ni.

Hemi hnuah hian sipaite nen sorkar intawm siamin mipui sorkar angin an kal a, hetih lai hian sipaiten an rama a tlem zawk, Muslim Rohingya-te a beih vak chungchangah sipaite chet dan tan zawnga thu a sawi avangin dem a hlawh a, UN International Court of Justice (ICJ)-ah pawh a chungthu rel a ni a. A kaihhruai sorkar sipaite chetna avang hian Myanmar atangin an thenawm, Bangladesh-ah mi maktaduai tel an tlanchhia.