India chuan a tuipui kam hnaih taka drone hmanga kar hmasaa ‘Israeli sumdawng lawng’ beih a nih hnuah Arabian Sea-ah a indo lawng pathum a tir tih a puang.

MV Chem Pluto hi khawthlang lam, Gujarat vaukam atanga tuipui mel 200 (km 370)-a hlaah beih a ni.

Lawngah hian kangmei a chhuah phah a; mahse, thawktuten rang takin an thelh mit thei a, thi leh hliam an awm lo.

He lawnga thawktute hi Indian 21 leh Vietnamese pakhat an ni.

MV Chem Pluto hi Liberia flag intar, Japanese ta leh Netherlands-in a enkawl chemical tanker a ni a. British Maritime Security firm Ambrey chuan he lawng hi Israel nen inkungkaihna nei niin a sawi a; mahse, engtin chiah nge an inzawm hriat a ni lo.

Indian chanchinbute chuan lawng hian Saudi Arabia atangin tuialhthei a phur a, India chhim lama Mangalore Port a pan laiin beih a tawk niin an tar lang hlawm.

Beih a tawh hnuah hian Indian Coast Guard lawngin kaihruai nghalin Thawhtanni khan MV Chem Pluto hi Mumbai panpui a ni.

“Tun hnaia Arabian Sea-a beihna thleng fo avang hian Indian Navy chuan Guided Missile Destroyer te, INS Mormugao, INS Kochi and INS Kolkata te chu heng thil lo do let turin hmun hrang hrangah a dah,” tiin navy chuan thu a chhuah.

Navy hian a khât tawkin hmun hla thawk thei maritime reconnaissance aircraft an thlawh kualtir reng tih a sawi bawk.

India hian Middle East, a bikin Saudi Arabia leh Iraq atangin tuialhthei a chaw lut nasa hle a. He kawngah hian harsatna a awm chuan atan buaina lian tak a tling thei.

“India hian Indian Ocean puma himna hi a kut ken a ni,” tiin Union Defence Minister Rajnath Singh chuan Thawhtanni khan a lo sawi tawh.

Indian Navy pawhin tuipui an thlithlai an uluk lehzual tih a sawi a. “He beihna thlenga mawhphutu hi kan zawng chhuak ngei ang a, na takin hremna pek a ni ang,” a ti bawk.

Drone hmanga lawng beitu-ah hian eng pawl mah an la inchhal lo va. United States erawh chuan Tehran a puh a; mahse, Iranian foreign ministry chuan he puhna hi ‘tanchhan awm lo’ tiin a chhang thung.

Tun hnaiah Israel-in Gaza a rûn mek duh lotu, Houthi hel pawlten Red Sea-ah sumdawng lawngte an beih fo avangin khawvel puma thil thawn kualna a buai phah mek.

US Central Command chuan thla hnih liam ta chhungin Houthi hian sumdawng lawng 15 vel an bei tawh niin a sawi.

Shipping company thenkhat chuan Red Sea an paltlang loh nan an kawng an thlak hlawm hial tawh a. Hei hi Asia chhim lama thil thawn chhuaktute tan buaina a tling thei.

Bangladesh Garment Manufacturers & Exporters Association Vice President Syed Nazrul Islam chuan, “Hei hian kan rilru a luah khawp mai. Kan shipping agent-ten phurh man hi 10-15% vela a san phah dawn bakah a thang chhung pawh ni nga atanga ni sarih velin a rei zawk dawn an ti a ni,” tiin BBC a hrilh.

Bangladesh hian Europe leh US-ah dollar tluklehdingawn tel man thawmhna siam sa a thawn chhuak thin.

Phurh man hi khawthlang lama clothing brand-te hian an tum vek thin ni mah se a man a to tawh dawn avangin an chah leh hunah tlawm an dil mai an hlauthawng hle tih Islam chuan a sawi bawk.