Aizawl July 11, 2024 : BJP Mizoram chuan vawiin khan Extended State Executive Meeting, BJP Mizoram State Office Upper Republic ah an nei a, he hun hmang tur hian Union MOS For Minority Affairs George Kurien leh MLC Bihar State Devesh Kumar, Mizoram State Prabhari te an lo kal a, District hrang hrang hruaitu te he hun hmang tur hian an kal khawm.

He hun hmang tur a lo kal, NDA sawrkara Kristian Minister awmchhun George Kurian chuan thu sawiin, "Ka nunah hian a hmasa berah Lal Isua Krista hi ka dah thin a, tawngtai hi ka ngaipawimawh em em a ni. Ka naupanlaiin kan Mathematics zirtirtu chuan Mathematics subject thiam tur chuan formula kha sawi reng mai tur, in awm mai mai pawhin in rilru in sawi reng rawh u min ti thin a, chutiang chiah chuan ram rorelna ah dikna leh hmasawnna a lo thlen theih nan kan tawngtai reng mai tur a ni. Fianrial-ah chauh ka tawngtai ngai lo, tunah pawh in zingah ka thut a ka lo thlen tirh pawhin ka tawngtai a, kan nun hi tawngtai nun nise, chutianga kan tih chuan Lal Isua Krista hian min kaihruai ang a, chutianga tawngtai mi te chuan Isua an dah hmasa lo thei lo a ni," a ti.

George Kurian chuan, "BJP chu development party a ni a development duh zawng chu BJP ah lo inpe vek turin ka sawm che u a, Kan ministry hnuaiah scheme hrang hrang awm te chu kan duh anih chuan theihtawp chhuahin ka lo tanpui dawn che u a, BJP Prime Minister Modi hian community tin te ang khat vekin min en a, Development hi India mipui huapin kan kalpui mek a ni," a ti.

George Kurian chuan, "1980-ah BJP-ah ka inpe a, kan khuaah 95% hi Christian kan ni a, tuman mak min ti lo va BJP chu anti-Christian a ni an ti ve ngai lo. Chuvangin BJP hi Anti-Christian kan nilova, Politics-a inbeihna mai a ni tih hi kan hriat a ngai a, BJP inghahna thurin chu integral humanism a ni. Hmasawnna tluantling kan neih theih nan nangni pawh tawngtai nun lo nei ula, BJP hian Mizoram-ah hmasawnna dik a thlen ve ngei ka beisei tlat a ni," a ti bawk.