Brazil-a khua leh khawpui 3,000 dawn tan khaw lum uchuak tak thleng tur avangin inralrinna khawn a ni.

Rio de Janeiro-ah chuan Pathianni khan 42.5°C zet niin November thlaa a lum ber tum record thar a ni a. Thawhlehni khan boruak a uap hle bawk a, 58.5°C ang vela lum a ni bawk niin khawpui thuneituten an sawi.

Khaw lum lutuk hi mi maktaduai telin an tuar mek a, Zirtawpni thleng hi a la lum dawn niin an sawi lawk bawk.

Thuneitute chuan El Niño leh sik leh sa inthlak nasa nghawng pakhat niin an sawi.

São Paulo khawpuiah chuan Thawhlehni chawhnu khan 37.3°C a ni tih National Institute of Meteorology (Inmet) chuan a sawi.

“Ka chau va, a hahthlak tak zet a ni,” tiin khawlaia leng kum 22 mi, Riquelme da Silva chuan AFP news agency a hrilh.

“Ina ka hawin tui vawtin ka inchiah a, ka chauh em avangin thawh pawh ka tho hleithei lo va, mut pawh a harsa tho,” a ti.

Khawlaia inzuar thin kum 60 mi, Dora-i chuan pawn lama hna thawk mi tan chuan ‘awm ngaihna a awm lo’ niin a sawi.

Inmet chuan ram chhung hmun thenkhatah red alert a tichhuak a. Hei hi ni nga leh a aia rei a lum dan thin pangngai aia 5°C zeta lum thei hmun tihna a ni a, hriselna atan pawha tha lo thei tihna a ni.

Khawvel chhim lamah hian nipui thlen hma thla khat chuang mah khua a lum zual thin a. Brazil-ah hian miin intihdaihna tur hmanrua an hman nasat thin avangin energy ei ral pawh a pung hluai zel a ni.

Inmet hian kar hmasa July leh October thla inkara an ram pum lum dan chawhrual chu kuminah a san ber tum a nih thu an lo sawi tawh.

Khawvel hmun tam takah khaw awm dan uchuak tak tak hi a thleng tamin a na zual sawt zel a, hei hi sik leh sa inthlak nasa vang a ni pakhat.

Scientist-te chuan khaw lum uchuak hi hmun eng emaw zatah chuan a rei a, a na tawlh tawlh bawk dawn niin an sawi a, hei hi mihringin khua tilum zual thei greenhouse gas a tihchhuah tlem loh chuan a ni zel dawn tih an sawi.

Hetih lai hian khawvel hi El Niño weather phase-ah a awm mek a, hetih lai hian khawvel pum hi a lum zual hret thin hrim hrim bawk a ni.