Aizawl: Comptroller and Auditor General of India report thar ber tihchhuahah chuan Taxation department-ah chhiah chawi tur chhut dik loh avangin chawi loh tam tak a awm tih tarlan a ni.

Assembly session hnuhnung bera pharh tak CAG report-ah hian Deputy Commissioner of Taxes, North Zone Aizawl chuan furniture hralhtu hnen atanga chhiah chawi tur a chhutnaah tih dik loh a nei tih a tarlang a. Taxation hnuaia Assessing Officer-ten bung raw hralh zat leh an hralh bâng (stock) an chhut dik loh vang hian chhiah pek tur/ sawrkar hmuh tur nuai 87.91 chu hmuh a ni lo niin a tarlang. CAG report chuan Deputy Commissioner of Taxes, Central zone hnuaiah electronic dealer-in an bungraw hralhna atangin chhiah nuai 13.53 a pe lo niin a tarlang a.

Report chuan dealer hian a bungraw neih sa nuai 84.59 hu bakah a lak thar nuai 173.86 nen belhkhawmin nuai 258.45-ah chhiah nuai 23.27 pek tur a nih laiin nuai 9.74 chauh a pe a, nuai 13.53 hi pek a ni lo niin a tarlang. Zu chhiah pek chungchangah pawh thil dik lo a awm niin CAG report-ah chuan tarlan a ni bawk a.

Deputy Commissioner of Taxes, Central zone hnuaia zu pechhuaktu (vendor) pahnih chuan an chhiah pek tur ang an pe lo niin a tarlang bawk a. Vendor pahnihte hian kum 2015 -2017 chhungin a senchi (IMFL) leh beer nuai 674.25 an hralh nia an sawi laiin Excise & Narcotics department in zu dawr neitu mi 6-te zu hralh chu case 9,98,556.01 niin an hralhna atanga an sum hmuh hi nuai 2055.84 niin a tarlang a. Zu hralhna inthlauhna/thuhruk hi nuai 1381.59 a ni tiin an hlep atanga chhutin chhhiah pek loh nuai 28.44 a awm niin a tarlang bawk.