Aizawl: State Bank of India chuan tun Financial Year 2018-19 (January to March 2019) quarter atangin in Bank deposit (Saving leh Fixed) neih zawng zawngah TDS (Tax Deduction at Source) chu a cut tawh dawn nia sawi a nih laiin bank hrang hrang thawktu te chuan thuchiang a la awm loh thu Zalen an hrilh.
SBI thuchhuah tarlan danin tuna ruahmanna thar hi Central sawrkar in Income tax Act 1961 hmanga hma a lakna anih angin, Corporate Office, Mumbai chuan TDS hi customer account atangin lak anih tur thu a ti chhuak niin an sawi a. Scheduled Tribe (ST) in tax exemption (pek ngaih lohna) kan neih leh TDS a tax chawi hian inkungkaihna a nei lo niin an sawi. Kum khata bank deposit (Saving leh Fixed) interest income (pung) hi Rs. 10,000/- aia tamah TDS hi 10% cut tur niin Senior citizen (kum 60 chung lam) tan Rs. 50,000/- aia tamah cut tur a ni a, PAN card nei lo 20% cut a ni thung ang. Tax exemption certificate hi Income tax office atanga la chhuak thei tan chuan TDS hi cut a ni dawn lo nia tarlan a ni.
Bank hrang hrang te Zalen-in a zawh kualnaah chuan hetianga cut tur tih hi an la hriat loh thu an sawi. Hemi chungchanga Zalen zawhna chhangin SBI thawktute chuan hei hi thil thar a nih avangin an la chiang bik lo tih an sawi a, a tul anga training neih an tum niin an sawi bawk. SBI thawktute chuan tuna ruahmanna thar chu pawisa dah zat ni lovin a pung (interest) atang chauha chhut tur a nih avangin thil hlauhawm a nih an rin loh thu an sawi bawk.