Telangana Congress chief, November 30-a assembly inthlana an party-in hnehna an chan theih nana thawhhlawk tak, Anumula Revanth Reddy chu Ningani khan an state chief minister pahnihna atan lak luh a ni.

Reddy-a hi Telangana Governor Tamilisai Soundararajan chuan Lal Bahadur Shastri Stadium, Hyderabad-a mi nuai khat vel zet pungkhawm hmaah rinawmna thu tiamtirin a la lut a ni.

Reddy-a bakah hian a cabinet member tur mi 11 lak luh nghal an ni a. Bhatti Vikaramarka-a chu deputy chief minister atan lak luh a ni a. Telangana Congress chief hlui, N Uttam Kumar Reddy, Sridhar Babu, Ponnam Prabhakar, Komatireddy Venkat Reddy, Damodar Rajanarasimha, Ponguleti Srinivas Reddy, Dana Anasuya, Tummala Nageswar Rao, Konda Surekha leh Jupally Krishna Rao te lak luh an ni.

Congress sorkar thar lak luh hi Gandhi chhungkua - Sonia Gandhi, Rahul Gandhi leh Priyanka Gandhi Vadra bakah Congress chief Mallikarjun Kharge, Karnataka Chief Minister Siddaramaiah leh Deputy Chief Minister DK Shivakumar te pawhin an telpui.

Prime Minister Narendra Modi chuan Reddy-a hi lawmpuiin Telangana hmasawnna atan a thlawp zel tur thu a sawi bawk.

Lak luh inkhawm tan hma hian Reddy-a leh Gandhi-i chuan khelmual chhungah lirthei chung hawnah hnehna lawm nan pung khawmte fang kualin chibai an buk bawk.

Congress hian kum 2014-a an state a pian tirh atanga sorkarna chelh tawh, K Chandrashekar Rao-a kaihhruai, Bharat Rashtra Samithi chu paih thlain bial 119 awmah bial 65 an la a ni.

Reddy-a hi amah thlawptute chuan Tiger Revanth tiin an sawi thin a, an party-in hnehna an chan nan hian a thawh hlawk hle a. Kum 2017 khan TDP atangin Congress a zawm a, kum 2017 khan Telangana Congress president atan ruat a ni.

Kum hnih chuang liam ta chhung khan KCR-a kaihhruai beiin a campaign nasa a, thil hrang hrangah khawlaiah lungawi lohna lantirna a huaihawt nasa hle bawk a. Chu chu a rah sengin BRS an paih thla ta a ni.

Hetih lai hian hnehna an chan rual chiahin Reddy-a hian chon adang a hmachhawn nghal a. An party chhungah chief minister atana dah duh lo an awm a, ei rua puh tawk leh inthlana ding zingah an din theih nana mi hnen atanga pawisa laa puh a ni bawk.

Amah pawhin nasa takin chanvo sang a chan theih nan hian a bei ve bawk a, a lamtang tur pawh a zawng nasa hle a. A hlawhtling ta a ni.

Tunah chuan chief minister thutthlengah a thu ta a, Congress-in an campaign au hlate tihlawhtling turin a bei a ngai a, Lok Sabha inthlan nan thla ruk chauh a awm tawh bawk avangin a beih nasa a ngai dawn hle bawk.