ZALEN, Mar. 29, 2025: Mi thahnemngaiten ram an peka Tuikual South YMA-in an din, Ralliana & Rokunga YMA Sports Complex chu bialtu MLA, sports minister ni bawk, Lalnghinglova (Tetea) Hmar-in Zirtawpni zan khan a hawng.

Sports minister chuan sports complex siamna tura ram petute thiltih chu chhuanawm a tih thu a sawi a, a hlawhtlin nana theihtawp chhuahtu YMA, local council leh sorkar hmasaa mawhphurtute chungah pawh lawmthu sawi.

Sports complex chu naupang zawkte chher nan tangkai taka hmang turin a chah a. Uluk taka enkawl tur leh zu leh ruihhlo tihna hmun chang lo tura vil zui turin Tuikual South khawtlang hruaitute a sawm bawk.  

Sports complex  hmun atan hian Ralliana (fam) chhungten an pa hriatreng nan an ram pein Ralliana Memorial Basketball Court tih a ni a. A bul chiaha ram neitu, Rokunga chuan a ram chu a pe ve leh a, futsal ground siam niin Rokunga Futsal Ground tih a ni thung a. Infiamna hmun pahnih awm dun ta hi ‘Ralliana & Rokunga - YMA Sports Complex’ tih a ni ta a ni. 

A hawnna inkhawm hi R.Laldinthara, President, Tuikual South Branch YMA -in a kaihruai a ni.